호흡부호 보기
강세부호 보기
장단부호 보기
작은 Iota 보기
모든 부호 보기
ὁ δὲ τοῦ Μονοίκου λιμὴν ὁρ́μοσ ἐστὶν οὐ μεγάλαισ οὐδὲ πολλαῖσ ναυσίν, ἔχων ἱερὸν Ἡρακλέουσ Μονοίκου καλουμένου· ἐοίκε δὲ ἀπὸ τοῦ ὀνόματοσ καὶ μέχρι δεῦρο διατείνειν ὁ Μασσαλιωτικὸσ παράπλουσ· διέχει δ’ Ἀντιπόλεωσ μικρῷ πλείουσ ἢ διακοσίουσ σταδίουσ. τοὐντεῦθεν δ’ ἤδη μέχρι Μασσαλίασ καὶ μικρὸν προσωτέρω τὸ τῶν Σαλύων ἔθνοσ οἰκεῖ τὰσ Ἄλπεισ τὰσ ὑπερκειμένασ καί τινα τῆσ αὐτῆσ παραλίασ ἀναμὶξ τοῖσ Ἕλλησι. καλοῦσι δὲ τοὺσ Σάλυασ οἱ μὲν παλαιοὶ τῶν Ἑλλήνων Λίγυασ καὶ τὴν χώραν, ἣν ἔχουσιν οἱ Μασσαλιῶται, Λιγυστικήν, οἱ δ’ ὕστερον Κελτολίγυασ ὀνομάζουσι, καὶ τὴν μέχρι Αὐενίωνοσ καὶ τοῦ Ῥοδανοῦ πεδιάδα τούτοισ προσνέμουσιν, ἀφ’ ἧσ οὐ πεζὴν μόνον ἀλλὰ καὶ ἱππικὴν ἔστελλον στρατιάν, εἰσ δέκα μέρη διῃρημένοι. πρώτουσ δ’ ἐχειρώσαντο Ῥωμαῖοι τούτουσ τῶν ὑπεραλπείων Κελτῶν, πολὺν χρόνον πολεμήσαντεσ καὶ τούτοισ καὶ τοῖσ Λίγυσιν, ἀποκεκλεικόσι τὰσ εἰσ τὴν Ἰβηρίαν παρόδουσ τὰσ διὰ τῆσ παραλίασ. καὶ γὰρ καὶ κατὰ γῆν καὶ κατὰ θάλατταν ἐλῄζοντο καὶ τοσοῦτον ἴσχυον ὥστε μόλισ στρατοπέδοισ μεγάλοισ πορευτὴν εἶναι τὴν ὁδόν. ὀγδοηκοστὸν δ’ ἔτοσ πολεμοῦντεσ διεπράξαντο μόλισ ὥστ’ ἐπὶ δώδεκα σταδίουσ τὸ πλάτοσ ἀνεῖσθαι τὴν ὁδὸν τοῖσ ὁδεύουσι δημοσίᾳ. μετὰ ταῦτα μέντοι κατέλυσαν ἅπαντασ καὶ διέταξαν αὐτοὶ τὰσ πολιτείασ, ἐπιστήσαντεσ φόβον.

이 저작물은 크리에이티브 커먼즈 저작자표시-비영리 4.0 국제 라이선스에 따라 이용할 수 있습니다.
bab2min@gmail.com
호흡부호 보기
강세부호 보기
장단부호 보기
작은 Iota 보기
모든 부호 보기