Strabo, Geography, Book 6, chapter 2 22:

(스트라본, 지리학, Book 6, chapter 2 22:)

τὴν μὲν δὴ Λιπάραν καὶ τὴν Θέρμεσσαν εἰρήκαμεν. ἡ δὲ Στρογγύλη καλεῖται μὲν ἀπὸ τοῦ σχήματοσ, ἔστι δὲ καὶ αὕτη διάπυροσ, βίᾳ μὲν φλογὸσ λειπομένη τῷ δὲ φέγγει πλεονεκτοῦσα· ἐνταῦθα δὲ τὸν Αἰόλον οἰκῆσαί φασι. τετάρτη δ’ ἐστὶ Διδύμη, καὶ αὕτη δ’ ἀπὸ τοῦ σχήματοσ ὠνόμασται. τῶν δὲ λοιπῶν Ἐρικοῦσσα μὲν καὶ Φοινικοῦσσα ἀπὸ τῶν φυτῶν κέκληνται, ἀνεῖνται δὲ εἰσ νομάσ. ἑβδόμη δ’ ἐστὶν Εὐώνυμοσ, πελαγία μάλιστα καὶ ἔρημοσ· ὠνόμασται δ’ ὅτι μάλιστα τοῖσ εἰσ Λιπάρασ ἐκ Σικελίασ πλέουσιν εὐώνυμόσ ἐστι. πολλάκισ δὲ καὶ φλόγεσ εἰσ τὴν ἐπιφάνειαν τοῦ πελάγουσ τοῦ περὶ τὰσ νήσουσ ὤφθησαν ἐπιδραμοῦσαι, τῶν κατὰ βάθουσ κοιλιῶν ἀναστομωθέντοσ πόρου τινὸσ καὶ τοῦ πυρὸσ βιασαμένου πρὸσ τὸ ἐκτόσ. Ποσειδώνιοσ δὲ κατὰ τὴν ἑαυτοῦ μνήμην φησὶ περὶ τροπὰσ θερινὰσ ἅμα τῇ ἑῴ μεταξὺ τῆσ Ιἕρασ καὶ τῆσ Εὐωνύμου πρὸσ ὕψοσ ἀρθεῖσαν ἐξαίσιον τὴν θάλατταν ὁραθῆναι, καὶ συμμεῖναί τινα χρόνον ἀναφυσωμένην συνεχῶσ, εἶτα παύσασθαι· τοὺσ δὲ τολμήσαντασ προσπλεῖν, ἰδόντασ νεκροὺσ ἰχθύασ ἐλαυνομένουσ ὑπὸ τοῦ ῥοῦ καὶ θέρμῃ καὶ δυσωδίᾳ πληγέντασ φυγεῖν, ἓν δὲ τῶν πλοιαρίων τὸ μᾶλλον πλησιάσαν τοὺσ μὲν τῶν ἐνόντων ἀποβαλεῖν τοὺσ δ’ εἰσ Λιπάραν μόλισ σῶσαι, τοτὲ μὲν ἔκφρονασ γινομένουσ ὁμοίωσ τοῖσ ἐπιληπτικοῖσ τοτὲ δὲ ἀνατρέχοντασ εἰσ τοὺσ οἰκείουσ λογισμούσ· πολλαῖσ δ’ ἡμέραισ ὕστερον ὁρᾶσθαι πηλὸν ἐπανθοῦντα τῇ θαλάττῃ, πολλαχοῦ δὲ καὶ φλόγασ ἐκπιπτούσασ καὶ καπνοὺσ καὶ λιγνύασ, ὕστερον δὲ παγῆναι καὶ γενέσθαι τοῖσ μυλίταισ λίθοισ ἐοικότα τὸν πάγον· τὸν δὲ τῆσ Σικελίασ στρατηγὸν Τίτον Φλαμίνιον δηλῶσαι τῇ συγκλήτῳ, τὴν δὲ πέμψασαν ἐκθύσασθαι ἔν τε τῷ νησιδίῳ καὶ ἐν Λιπάραισ τοῖσ τε καταχθονίοισ θεοῖσ καὶ τοῖσ θαλαττίοισ. ἀπὸ μὲν οὖν Ἐρικώδουσ εἰσ Φοινικώδη δέκα μίλιά φησιν ὁ χωρογράφοσ, ἔνθεν δ’ εἰσ Διδύμην τριάκοντα, ἔνθεν δ’ εἰσ Λιπάραν πρὸσ ἄρκτον ἐννέα καὶ εἴκοσιν, ἔνθεν δ’ εἰσ Σικελίαν ἐννεακαίδεκα· ἑκκαίδεκα δ’ ἐκ τῆσ Στρογγύλησ. πρόκειται δὲ τοῦ Παχύνου Μελίτη, ὅθεν τὰ κυνίδια ἃ καλοῦσι Μελιταῖα, καὶ Γαῦδοσ, ὀγδοήκοντα καὶ ὀκτὼ μίλια τῆσ ἄκρασ ἀμφότεραι διέχουσαι· Κόσσουρα δὲ πρὸ τοῦ Λιλυβαίου καὶ πρὸ τῆσ Ἀσπίδοσ Καρχηδονιακῆσ πόλεωσ ἣν Κλυπέαν καλοῦσι, μέση ἀμφοῖν κειμένη καὶ τὸ λεχθὲν διάστημα ἀφ’ ἑκατέρασ ἀπέχουσα· καὶ ἡ Αἰγίμουροσ δὲ πρὸ τῆσ Σικελίασ καὶ τῆσ Λιβύησ ἐστὶ καὶ ἄλλα μικρὰ νησίδια. ταῦτα μὲν περὶ τῶν νήσων.

상위

Geography (지리학)

목록

일치하는 문장이 없습니다.

SEARCH

MENU NAVIGATION