Strabo, Geography, Book 6, chapter 2 12:

(스트라본, 지리학, Book 6, chapter 2 12:)

ἐν δὲ τῇ μεσογαίᾳ τὴν μὲν Ἔνναν, ἐν ᾗ τὸ ἱερὸν τῆσ Δήμητροσ, ἔχουσιν ὀλίγοι, κειμένην ἐπὶ λόφῳ, περιειλημμένην πλατέσιν ὀροπεδίοισ ἀροσίμοισ πᾶσιν. ἐκάκωσαν δ’ αὐτὴν μάλιστα ἐμπολιορκηθέντεσ οἱ περὶ Εὔνουν δραπέται καὶ μόλισ ἐξαιρεθέντεσ ὑπὸ Ῥωμαίων· ἔπαθον δὲ τὰ αὐτὰ ταῦτα καὶ Καταναῖοι καὶ Ταυρομενῖται καὶ ἄλλοι πλείουσ. ἡ δ’ ἄλλη κατοικία καὶ τῆσ μεσογαίασ ποιμένων ἡ πλείστη γεγένηται· οὔτε γὰρ Ἱμέραν ἔτι συνοικουμένην ἴσμεν οὔτε Γέλαν οὔτε Καλλίπολιν οὔτε Σελινοῦντα οὔτ’ Εὔβοιαν οὔτ’ ἄλλασ πλείουσ, ὧν τὴν μὲν Ἱμέραν οἱ ἐν Μυλαῖσ ἔκτισαν Ζαγκλαῖοι, Γέλαν δὲ Ῥόδιοι, Καλλίπολιν δὲ Νάξιοι, Σελινοῦντα δὲ οἱ αὐτόθι Μεγαρεῖσ, Εὔβοιαν δὲ οἱ Λεοντῖνοι. κεκάκωται δὲ καὶ ἡ Λεοντίνη πᾶσα, Ναξίων οὖσα καὶ αὐτὴ τῶν αὐτόθι· τῶν μὲν γὰρ ἀτυχημάτων ἐκοινώνησαν ἀεὶ τοῖσ Συρακουσσίοισ, τῶν δ’ εὐτυχημάτων οὐκ ἀεί. καὶ τῶν βαρβαρικῶν δ’ ἐξελείφθησαν πολλαί, καθάπερ οἱ Καμικοὶ τὸ Κωκάλου βασίλειον, παρ’ ᾧ Μίνωσ δολοφονηθῆναι λέγεται. τὴν οὖν ἐρημίαν κατανοήσαντεσ Ῥωμαῖοι κατακτησάμενοι τά τε ὄρη καὶ τῶν πεδίων τὰ πλεῖστα ἱπποφορβοῖσ καὶ βουκόλοισ καὶ ποιμέσι παρέδοσαν· ὑφ’ ὧν πολλάκισ εἰσ κινδύνουσ κατέστη μεγάλουσ ἡ νῆσοσ, τὸ μὲν πρῶτον ἐπὶ λῃστείασ τρεπομένων σποράδην τῶν νομέων, εἶτα καὶ κατὰ πλήθη συνισταμένων καὶ πορθούντων τὰσ κατοικίασ, καθάπερ ἡνίκα οἱ περὶ Εὔνουν τὴν Ἔνναν κατέσχον. νεωστὶ δ’ ἐφ’ ἡμῶν εἰσ τὴν Ῥώμην ἀνεπέμφθη Σέλουρόσ τισ, Αἴτνησ υἱὸσ λεγόμενοσ, στρατιᾶσ ἀφηγησάμενοσ καὶ λεηλασίαισ πυκναῖσ καταδεδραμηκὼσ τὰ κύκλῳ τῆσ Αἴτνησ πολὺν χρόνον, ὃν ἐν τῇ ἀγορᾷ μονομάχων ἀγῶνοσ συνεστῶτοσ εἴδομεν διασπασθέντα ὑπὸ θηρίων· ἐπὶ πήγματοσ γάρ τινοσ ὑψηλοῦ τεθεὶσ ὡσ ἂν ἐπὶ τῆσ Αἴτνησ, διαλυθέντοσ αἰφνιδίωσ καὶ συμπεσόντοσ κατηνέχθη καὶ αὐτὸσ εἰσ γαλεάγρασ θηρίων εὐδιαλύτουσ ἐπίτηδεσ παρεσκευασμένασ ὑπὸ τῷ πήγματι.

상위

Geography (지리학)

목록

일치하는 문장이 없습니다.

SEARCH

MENU NAVIGATION