Strabo, Geography, book 3, chapter 2 12:

(스트라본, 지리학, book 3, chapter 2 12:)

ἐξάγεται δ’ ἐκ τῆσ Τουρδητανίασ σῖτόσ τε καὶ οἶνοσ πολὺσ καὶ ἔλαιον οὐ πολὺ μόνον ἀλλὰ καὶ κάλλιστον· καὶ κηρὸσ δὲ καὶ μέλι καὶ πίττα ἐξάγεται καὶ κόκκοσ πολλὴ καὶ μίλτοσ οὐ χείρων τῆσ Σινωπικῆσ γῆσ. τά τε ναυπήγια συνιστᾶσιν αὐτόθι ἐξ ἐπιχωρίασ ὕλησ, ἅλεσ τε ὀρυκτοὶ παρ’ αὐτοῖσ εἰσι καὶ ποταμῶν ἁλμυρῶν ῥεύματα οὐκ ὀλίγα· οὐκ ὀλίγη δὲ οὐδὲ ἐκ τῶν ὄψων ταριχεία οὐκ ἔνθεν μόνον ἀλλὰ καὶ ἐκ τῆσ ἄλλησ τῆσ ἐκτὸσ στηλῶν παραλίασ, οὐ χείρων τῆσ Ποντικῆσ. πολλὴ δὲ καὶ ἐσθὴσ πρότερον ἤρχετο, νῦν δὲ ἔρια μᾶλλον τῶν κοραξῶν. καὶ ὑπερβολή τίσ ἐστι τοῦ κάλλουσ· ταλαντιαίουσ γοῦν ὠνοῦνται τοὺσ κριοὺσ εἰσ τὰσ ὀχείασ. ὑπερβολὴ δὲ καὶ τῶν λεπτῶν ὑφασμάτων, ἅπερ οἱ Σαλτιγῖται κατασκευάζουσιν. ἄφθονοσ δὲ καὶ βοσκημάτων εὐπορία παντοίων καὶ κυνηγεσίων. τῶν δ’ ὀλεθρίων θηρίων σπάνισ πλὴν τῶν γεωρύχων λαγιδέων, οὓσ ἔνιοι λεβηρίδασ προσαγορεύουσι· λυμαίνονται γὰρ καὶ φυτὰ καὶ σπέρματα ῥιζοφαγοῦντεσ· καὶ τοῦτο συμβαίνει καθ’ ὅλην τὴν Ἰβηρίαν σχεδόν τι, διατείνει δὲ καὶ μέχρι Μασσαλίασ, ὀχλεῖ δὲ καὶ τὰσ νήσουσ. οἱ δὲ τὰσ Γυμνησίασ οἰκοῦντεσ λέγονται πρεσβεύσασθαί ποτε πρὸσ Ῥωμαίουσ κατὰ χώρασ αἴτησιν· ἐκβάλλεσθαι γὰρ ὑπὸ τῶν ζῴων τούτων, ἀντέχειν μὴ δυνάμενοι διὰ τὸ πλῆθοσ. πρὸσ μὲν οὖν τὸν τοσοῦτον ἴσωσ πόλεμον, ὃσ οὐκ ἀεὶ συμβαίνει, φορᾷ δέ τινι λοιμικῇ καθάπερ ὄφεων καὶ μυῶν τῶν ἀρουραίων, χρεία τῆσ τοσαύτησ ἐπικουρίασ, πρὸσ δὲ τὸ μέτριον ἐξεύρηνται πλείουσ θῆραι· καὶ δὴ καὶ γαλᾶσ ἀγρίασ ἃσ ἡ Λιβύη φέρει τρέφουσιν ἐπίτηδεσ, ἃσ φιμώσαντεσ παριᾶσιν εἰσ τὰσ ὀπάσ· αἱ δ’ ἐξέλκουσιν ἔξω τοῖσ ὄνυξιν οὓσ ἂν καταλάβωσιν, ἢ φεύγειν ἀναγκάζουσιν εἰσ τὴν ἐπιφάνειαν, ἐκπεσόντασ δὲ θηρεύουσιν οἱ ἐφεστῶτεσ. τὴν δὲ ἀφθονίαν τῶν ἐκκομιζομένων ἐκ τῆσ Τουρδητανίασ ἐμφανίζει τὸ μέγεθοσ καὶ τὸ πλῆθοσ τῶν ναυκληρίων· ὁλκάδεσ γὰρ μέγισται παρὰ τούτων πλέουσιν εἰσ Δικαιάρχειαν καὶ τὰ Ὤστια τῆσ Ῥώμησ ἐπίνειον· τὸ δὲ πλῆθοσ μικροῦ δεῖν ἐνάμιλλον τοῖσ Λιβυκοῖσ.

일치하는 문장이 없습니다.

SEARCH

MENU NAVIGATION