Strabo, Geography, book 1, chapter 2 16:

(스트라본, 지리학, book 1, chapter 2 16:)

καὶ πρῶτον ὅτι τοὺσ μύθουσ ἀπεδέξαντο οὐχ οἱ ποιηταὶ μόνον, ἀλλὰ καὶ αἱ πόλεισ πολὺ πρότερον καὶ οἱ νομοθέται τοῦ χρησίμου χάριν, βλέψαντεσ εἰσ τὸ φυσικὸν πάθοσ τοῦ λογικοῦ ζῴου· φιλειδήμων γὰρ ἅνθρωποσ, προοίμιον δὲ τούτου τὸ φιλόμυθον. ἐντεῦθεν οὖν ἄρχεται τὰ παιδία ἀκροᾶσθαι καὶ κοινωνεῖν λόγων ἐπὶ πλεῖον. αἴτιον δ’, ὅτι καινολογία τίσ ἐστιν ὁ μῦθοσ, οὐ τὰ καθεστηκότα φράζων ἀλλ’ ἕτερα παρὰ ταῦτα· ἡδὺ δὲ τὸ καινὸν καὶ ὃ μὴ πρότερον ἔγνω τισ· τοῦτο δ’ αὐτό ἐστι καὶ τὸ ποιοῦν φιλειδήμονα. ὅταν δὲ προσῇ καὶ τὸ θαυμαστὸν καὶ τὸ τερατῶδεσ, ἐπιτείνει τὴν ἡδονήν, ἥπερ ἐστὶ τοῦ μανθάνειν φίλτρον. κατ’ ἀρχὰσ μὲν οὖν ἀνάγκη τοιούτοισ δελέασι χρῆσθαι, προϊούσησ δὲ τῆσ ἡλικίασ ἐπὶ τὴν τῶν ὄντων μάθησιν ἄγειν, ἤδη τῆσ διανοίασ ἐρρωμένησ καὶ μηκέτι δεομένησ κολάκων. καὶ ἰδιώτησ δὲ πᾶσ καὶ ἀπαίδευτοσ τρόπον τινὰ παῖσ ἐστι φιλομυθεῖ τε ὡσαύτωσ· ὁμοίωσ δὲ καὶ ὁ πεπαιδευμένοσ μετρίωσ· οὐδὲ γὰρ οὗτοσ ἰσχύει τῷ λογισμῷ, πρόσεστι δὲ καὶ τὸ ἐκ παιδὸσ ἔθοσ. ἐπεὶ δ’ οὐ μόνον ἡδὺ ἀλλὰ καὶ φοβερὸν τὸ τερατῶδεσ, ἀμφοτέρων ἐστὶ τῶν εἰδῶν χρεία πρόσ τε τοὺσ παῖδασ καὶ τοὺσ ἐν ἡλικίᾳ· τοῖσ τε γὰρ παισὶ προσφέρομεν τοὺσ ἡδεῖσ μύθουσ εἰσ προτροπήν, εἰσ ἀποτροπὴν δὲ τοὺσ φοβερούσ· ἥ τε γὰρ Λάμια μῦθόσ ἐστι καὶ ἡ Γοργὼ καὶ ὁ Ἐφιάλτησ καὶ ἡ Μορμολύκη. οἵ τε πολλοὶ τῶν τὰσ πόλεισ οἰκούντων εἰσ μὲν προτροπὴν ἄγονται τοῖσ ἡδέσι τῶν μύθων, ὅταν ἀκούωσι τῶν ποιητῶν ἀνδραγαθήματα μυθώδη διηγουμένων, οἱο͂ν Ἡρακλέουσ ἄθλουσ ἢ Θησέωσ, ἢ τιμὰσ παρὰ θεῶν νεμομένασ, ἢ νὴ Δία ὁρῶσι γραφὰσ ἢ ξόανα ἢ πλάσματα τοιαύτην τινὰ περιπέτειαν ὑποσημαίνοντα μυθώδη· εἰσ ἀποτροπὴν δέ, ὅταν κολάσεισ παρὰ θεῶν καὶ φόβουσ καὶ ἀπειλὰσ ἢ διὰ λόγων ἢ διὰ τύπων ἀοράτων τινῶν προσδέχωνται, ἢ καὶ πιστεύωσι περιπεσεῖν τινασ. οὐ γὰρ ὄχλον γε γυναικῶν καὶ παντὸσ χυδαίου πλήθουσ ἐπαγαγεῖν λόγῳ δυνατὸν φιλοσόφῳ καὶ προσκαλέσασθαι πρὸσ εὐσέβειαν καὶ ὁσιότητα καὶ πίστιν, ἀλλὰ δεῖ καὶ διὰ δεισιδαιμονίασ· τοῦτο δ’ οὐκ ἄνευ μυθοποιίασ καὶ τερατείασ. κεραυνὸσ γὰρ καὶ αἰγὶσ καὶ τρίαινα καὶ λαμπάδεσ καὶ δράκοντεσ καὶ θυρσόλογχα τῶν θεῶν ὅπλα μῦθοι καὶ πᾶσα θεολογία ἀρχαϊκή· ταῦτα δ’ ἀπεδέξαντο οἱ τὰσ πολιτείασ καταστησάμενοι μορμολύκασ τινὰσ πρὸσ τοὺσ νηπιόφρονασ. τοιαύτησ δὲ τῆσ μυθοποιίασ οὔσησ καὶ καταστρεφούσησ εἰσ τὸ κοινωνικὸν καὶ τὸ πολιτικὸν τοῦ βίου σχῆμα καὶ τὴν τῶν ὄντων ἱστορίαν, οἱ μὲν ἀρχαῖοι τὴν παιδικὴν ἀγωγὴν ἐφύλαξαν μέχρι τῶν τελείων ἡλικιῶν, καὶ διὰ ποιητικῆσ ἱκανῶσ σωφρονίζεσθαι πᾶσαν ἡλικίαν ὑπέλαβον· χρόνοισ δ’ ὕστερον ἡ τῆσ ἱστορίασ γραφὴ καὶ ἡ νῦν φιλοσοφία παρελήλυθεν εἰσ μέσον. αὕτη μὲν οὖν πρὸσ ὀλίγουσ, ἡ δὲ ποιητικὴ δημωφελεστέρα καὶ θέατρα πληροῦν δυναμένη, ἡ δὲ δὴ τοῦ Ὁμήρου ὑπερβαλλόντωσ· καὶ οἱ πρῶτοι δὲ ἱστορικοὶ καὶ φυσικοὶ μυθογράφοι.

상위

Geography (지리학)

목록

일치하는 문장이 없습니다.

SEARCH

MENU NAVIGATION