Euripides, Rhesus, episode, iambic

(에우리피데스, Rhesus, episode, iambic)

τάδ’ οὐκ ἐν αἰνιγμοῖσι σημαίνει κακά· σαφῶσ γὰρ αὐδᾷ συμμάχουσ ὀλωλότασ. κακῶσ πέπρακται κἀπὶ τοῖσ κακοῖσι πρὸσ αἴσχιστα· καίτοι δὶσ τόσον κακὸν τόδε· θανεῖν γὰρ εὐκλεῶσ μέν, εἰ θανεῖν χρεών, λυπρὸν μὲν οἶμαι τῷ θανόντι ‐ πῶσ γὰρ οὔ; ‐ τοῖσ ζῶσι δ’ ὄγκοσ καὶ δόμων εὐδοξία. ἡμεῖσ δ’ ἀβούλωσ κἀκλεῶσ ὀλώλαμεν. ἐπεὶ γὰρ ἡμᾶσ ηὔνασ’ Ἑκτόρεια χείρ, ξύνθημα λέξασ, ηὕδομεν πεδοστιβεῖ κόπῳ δαμέντεσ, οὐδ’ ἐφρουρεῖτο στρατὸσ φυλακαῖσι νυκτέροισιν, οὐδ’ ἐν τάξεσιν ἔκειτο τεύχη, πλῆκτρά τ’ οὐκ ἐπὶ ζυγοῖσ ἵππων καθήρμοσθ’, ὡσ ἄναξ ἐπεύθετο κρατοῦντασ ὑμᾶσ κἀφεδρεύοντασ νεῶν πρύμναισι· φαύλωσ δ’ ηὕδομεν πεπτωκότεσ. κἀγὼ μελούσῃ καρδίᾳ λήξασ ὕπνου πώλοισι χόρτον, προσδοκῶν ἑωθινὴν ζεύξειν ἐσ ἀλκήν, ἀφθόνῳ μετρῶ χερί. λεύσσω δὲ φῶτε περιπολοῦνθ’ ἡμῶν στρατὸν πυκνῆσ δι’ ὄρφνησ· ὡσ δ’ ἐκινήθην ἐγώ, ἐπτηξάτην τε κἀνεχωρείτην πάλιν· ἤπυσα δ’ αὐτοῖσ μὴ πελάζεσθαι στρατῷ, κλῶπασ δοκήσασ συμμάχων πλάθειν τινάσ. οἳ δ’ οὐδέν· οὐ μὴν οὐδ’ ἐγὼ τὰ πλείονα. ηὗδον δ’ ἀπελθὼν αὖθισ ἐσ κοίτην πάλιν.

일치하는 문장이 없습니다.

SEARCH

MENU NAVIGATION