헬라어 문장 검색 - Διονψσ́Αντιθυι

(디오니시오스, Antiquitates Romanae, Books X-XX, book 15, chapter 7)

ἐπὶ τοὺσ προβούλουσ τῶν Σαυνιτῶν ἔλεξαν· ἀδικεῖτε, ἄνδρεσ Σαυνῖται, παραβαίνοντεσ τὰσ ὁμολογίασ, ἃσ ἐποιήσασθε πρὸσ ἡμᾶσ, ὄνομα μὲν ὑποδυόμενοι συμμάχων, ἔργα δὲ πράττοντεσ πολεμίων, πολλαῖσ μὲν ἡττηθέντεσ ὑπὸ Ῥωμαίων μάχαισ, δεήσει δὲ μεγάλῃ καταλυσάμενοι τὸν πόλεμον καὶ τυχόντεσ εἰρήνησ οἱάσ ἐβούλεσθε·

τὰ δὲ τελευταῖα φίλοι γενέσθαι τῆσ πόλεωσ ἡμῶν προθυμηθέντεσ καὶ σύμμαχοι καὶ τοὺσ αὐτοὺσ Ῥωμαίοισ ὀμόσαντεσ ἕξειν ἐχθροὺσ καὶ φίλουσ. ὧν ἁπάντων ἐπιλαθόμενοι καὶ παρ’ οὐδὲν ἡγησάμενοι τοὺσ ὁρ́κουσ ἐγκατελείπετε μὲν ἡμᾶσ ἐν τῷ πρὸσ Λατίνουσ πολέμῳ καὶ πρὸσ Οὐολούσκουσ συστάντι, οὓσ δι’ ὑμᾶσ ἐχθροὺσ ἔχομεν οὐ βουλόμενοι τοῦ καθ’ ὑμῶν αὐτοῖσ συνάρασθαι πολέμου·

ἐν δὲ τῷ παρελθόντι ἐνιαυτῷ Νεαπολίτασ δεδιότασ ἀναδεῖξαι τὸν καθ’ ἡμῶν πόλεμον ἁπάσῃ σπουδῇ καὶ προθυμίᾳ χρώμενοι παρωρμήσατε, μᾶλλον δ’ ἠναγκάσατε καὶ τὰσ δαπάνασ ἐπιχορηγεῖτε καὶ τὴν πόλιν δι’ ὑμῶν αὐτῶν ἔχετε.

νῦν δὲ παρασκευάζεσθε στρατιὰν ἐκ παντὸσ ἀγείροντεσ τόπου, πρόφασιν μὲν ἑτέραν ποιούμενοι, τὸ δ’ ἀληθὲσ ἐπὶ τοὺσ ἡμετέρουσ ἐγνωκότεσ ἄγειν ἀποίκουσ·

καὶ ἐπὶ ταύτασ τὰσ ἀδίκουσ πλεονεξίασ Φουνδανοὺσ παρακαλεῖτε καὶ Φορμιανοὺσ καὶ ἄλλουσ τινάσ, οἷσ ἡμεῖσ ἰσοπολιτείασ μετεδώκαμεν. οὕτω δὲ φανερῶσ καὶ ἀναισχύντωσ συγχεόντων ὑμῶν τὰ περὶ τῆσ φιλίασ καὶ συμμαχίασ ὁρ́κια, πρεσβείαν πρὸσ ὑμᾶσ ἐκρίναμεν ἀποστεῖλαι πρῶτον, καὶ μὴ πρότερον ἄρξαι τῶν ἔργων πρὶν ἢ πειραθῆναι τῶν λόγων.

ἃ δὲ προκαλούμεθα ὑμᾶσ, καὶ ὧν τυχόντεσ τὴν ἐπὶ τοῖσ παρελθοῦσιν ὀργὴν ἀποπληρώσειν οἰόμεθα, ταῦτα ἔστι·

πρῶτον μὲν ἀπάγειν ὑμᾶσ ἀξιοῦμεν τὴν ἀποσταλεῖσαν Νεαπολίταισ συμμαχίαν, ἔπειτα μηδεμίαν ἐκπέμπειν στρατιὰν κατὰ τῶν ἀποίκων τῶν ἡμετέρων μηδὲ τοὺσ ὑπηκόουσ ἐπὶ πάσασ τὰσ πλεονεξίασ παρακαλεῖν· εἰ δὲ μὴ πᾶσι δόξαντα ταῦτα ὑμῖν ἔπραττόν τινεσ, ἀλλ’ ἀπὸ τῆσ ἑαυτῶν γνώμησ, παραδοῦναι τοὺσ ἄνδρασ ἡμῖν ἐπὶ δίκην.

τούτων τυχόντεσ ἀρκούμεθα, μὴ τυχόντεσ δὲ θεοὺσ καὶ δαίμονασ, οὓσ ἐν ταῖσ συνθήκαισ ὠμόσατε, μαρτυρόμεθα, καὶ τοὺσ εἰρηνοδίκασ ἐπὶ τοῦτο ἄγοντεσ ἐληλύθαμεν.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Dionysius of Halicarnassus, Antiquitates Romanae, Books X-XX, book 15, chapter 7

(디오니시오스, Antiquitates Romanae, Books X-XX, book 15, chapter 7)

상위

목록

SEARCH

MENU NAVIGATION