Xenophon, Works on Socrates, Συμπόσιον, chapter 1 11:

πάντεσ μὲν οὖν οἱ ἐκ θεῶν του κατεχόμενοι ἀξιοθέατοι δοκοῦσιν εἶναι· ἀλλ’ οἱ μὲν ἐξ ἄλλων πρὸσ τὸ γοργότεροί τε ὁρᾶσθαι καὶ φοβερώτερον φθέγγεσθαι καὶ σφοδρότεροι εἶναι φέρονται, οἱ δ’ ὑπὸ τοῦ σώφρονοσ ἔρωτοσ ἔνθεοι τά τε ὄμματα φιλοφρονεστέρωσ ἔχουσι καὶ τὴν φωνὴν πρᾳοτέραν ποιοῦνται καὶ τὰ σχήματα εἰσ τὸ ἐλευθεριώτερον ἄγουσιν. ἃ δὴ καὶ Καλλίασ τότε διὰ τὸν ἔρωτα πράττων ἀξιοθέατοσ ἦν τοῖσ τετελεσμένοισ τούτῳ τῷ θεῷ.