헬라어 문장 검색 - ΧενοπήΗελλενί7́2́

(크세노폰, Hellenica, Ἑλληνικῶν Ζ, chapter 2)

οὕτω δὲ τούτων προκεχωρηκότων, καὶ τῶν τε Ἀργείων ἐπιτετειχικότων ἐν τῷ Φλειοῦντι τὸ ὑπὲρ τοῦ Ἡραίου Τρικάρανον, καὶ τῶν Σικυωνίων ἐπὶ τοῖσ ὁρίοισ αὐτῶν τειχιζόντων τὴν Θυαμίαν, μάλα ἐπιέζοντο οἱ Φλειάσιοι καὶ ἐσπάνιζον τῶν ἐπιτηδείων· ὅμωσ δὲ διεκαρτέρουν ἐν τῇ συμμαχίᾳ. ἀλλὰ γὰρ τῶν μὲν μεγάλων πόλεων, εἴ τι καλὸν ἔπραξαν, ἅπαντεσ οἱ συγγραφεῖσ μέμνηνται· ἐμοὶ δὲ δοκεῖ, καὶ εἴ τισ μικρὰ πόλισ οὖσα πολλὰ καὶ καλὰ ἔργα διαπέπρακται, ἔτι μᾶλλον ἄξιον εἶναι ἀποφαίνειν. Φλειάσιοι τοίνυν φίλοι μὲν ἐγένοντο Λακεδαιμονίοισ, ὅτ’ ἐκεῖνοι μέγιστοι ἦσαν·

σφαλέντων δ’ αὐτῶν ἐν τῇ ἐν Λεύκτροισ μάχῃ, καὶ ἀποστάντων μὲν πολλῶν περιοίκων, ἀποστάντων δὲ πάντων τῶν Εἱλώτων, ἔτι δὲ τῶν συμμάχων πλὴν πάνυ ὀλίγων, ἐπιστρατευόντων δ’ αὐτοῖσ ὡσ εἰπεῖν πάντων τῶν Ἑλλήνων, πιστοὶ διέμειναν, καὶ ἔχοντεσ πολεμίουσ τοὺσ δυνατωτάτουσ τῶν ἐν Πελοποννήσῳ Ἀρκάδασ καὶ Ἀργείουσ ὅμωσ ἐβοήθησαν αὐτοῖσ, καὶ διαβαίνειν τελευταῖοι λαχόντεσ εἰσ Πρασιὰσ τῶν συμβοηθησάντων, ἦσαν δ’ οὗτοι Κορίνθιοι, Ἐπιδαύριοι, Τροιζήνιοι, Ἑρμιονεῖσ, Ἁλιεῖσ, Σικυώνιοι καὶ Πελληνεῖσ· οὐ γάρ πω τότε ἀφέστασαν ‐ ἀλλ’ οὐδ’ ἐπεὶ ὁ ξεναγὸσ τοὺσ προδιαβεβῶτασ λαβὼν ἀπολιπὼν αὐτοὺσ ᾤχετο, οὐδ’ ὣσ ἀπεστράφησαν, ἀλλ’ ἡγεμόνα μισθωσάμενοι ἐκ Πρασιῶν, ὄντων τῶν πολεμίων περὶ Ἀμύκλασ, ὅπωσ ἐδύναντο διαδύντεσ εἰσ Σπάρτην ἀφίκοντο.

καὶ μὴν οἱ Λακεδαιμόνιοι ἄλλωσ τε ἐτίμων αὐτοὺσ καὶ βοῦν ξένια ἔπεμψαν. ἐπεὶ δ’ ἀναχωρησάντων τῶν πολεμίων ἐκ τῆσ Λακεδαίμονοσ οἱ Ἀργεῖοι ὀργιζόμενοι τῇ τῶν Φλειασίων περὶ τοὺσ Λακεδαιμονίουσ προθυμίᾳ ἐνέβαλον πανδημεὶ εἰσ τὸν Φλειοῦντα καὶ τὴν χώραν αὐτῶν ἐδῄουν, οὐδ’ ὣσ ὑφίεντο, ἀλλὰ καὶ ἐπεὶ ἀπεχώρουν φθείραντεσ ὅσα ἐδύναντο, ἐπεξελθόντεσ οἱ τῶν Φλειασίων ἱππεῖσ ἐπηκολούθουν αὐτοῖσ, καὶ ὀπισθοφυλακούντων τοῖσ Ἀργείοισ τῶν ἱππέων ἁπάντων καὶ λόχων τῶν μετ’ αὐτοὺσ τεταγμένων, ἐπιθέμενοι τούτοισ ἑξήκοντα ὄντεσ ἐτρέψαντο πάντασ τοὺσ ὀπισθοφύλακασ·

καὶ ἀπέκτειναν μὲν ὀλίγουσ αὐτῶν, τροπαῖον μέντοι ἐστήσαντο ὁρώντων τῶν Ἀργείων οὐδὲν διαφέρον ἢ εἰ πάντασ ἀπεκτόνεσαν αὐτούσ. αὖθισ δὲ Λακεδαιμόνιοι μὲν καὶ οἱ σύμμαχοι ἐφρούρουν τὸ Ὄνειον, Θηβαῖοι δὲ προσῇσαν ὡσ ὑπερβησόμενοι.

πορευομένων δὲ διὰ Νεμέασ τῶν Ἀρκάδων καὶ Ἠλείων, ὅπωσ συμμείξαιεν τοῖσ Θηβαίοισ, προσήνεγκαν μὲν λόγον τῶν Φλειασίων φυγάδεσ ὡσ εἰ ἐθελήσειαν ἐπιφανῆναι μόνον σφίσι, λάβοιεν ἂν Φλειοῦντα· ἐπεὶ δὲ ταῦτα συνωμολογήθη, τῆσ νυκτὸσ ὑπεκαθίζοντο ὑπ’ αὐτῷ τῷ τείχει κλίμακασ ἔχοντεσ οἵ τε φυγάδεσ καὶ ἄλλοι μετ’ αὐτῶν ὡσ ἑξακόσιοι. ἐπεὶ δὲ οἱ μὲν σκοποὶ ἐσήμαινον ἀπὸ τοῦ Τρικαράνου ὡσ πολεμίων ἐπιόντων, ἡ δὲ πόλισ πρὸσ τούτουσ τὸν νοῦν εἶχεν, ἐν δὴ τούτῳ οἱ προδιδόντεσ ἐσήμαινον τοῖσ ὑποκαθημένοισ ἀναβαίνειν. οἱ δ’ ἀναβάντεσ καὶ λαβόντεσ τῶν φρουρῶν τὰ ὅπλα ἔρημα, ἐδίωκον τοὺσ ἡμεροφύλακασ ὄντασ δέκα·

ἀφ’ ἑκάστησ δὲ τῆσ πεμπάδοσ εἷσ ἡμεροφύλαξ κατελείπετο· καὶ ἕνα μὲν ἔτι καθεύδοντα ἀπέκτειναν, ἄλλον δὲ καταφυγόντα πρὸσ τὸ Ἥραιον. φυγῇ δ’ ἐξαλλομένων κατὰ τοῦ τείχουσ τοῦ εἰσ τὸ ἄστυ ὁρῶντοσ τῶν ἡμεροφυλάκων, ἀναμφισβητήτωσ εἶχον οἱ ἀναβάντεσ τὴν ἀκρόπολιν. ἐπεὶ δὲ κραυγῆσ εἰσ τὴν πόλιν ἀφικομένησ ἐβοήθουν οἱ πολῖται, τὸ μὲν πρῶτον ἐπεξελθόντεσ ἐκ τῆσ ἀκροπόλεωσ οἱ πολέμιοι ἐμάχοντο ἐν τῷ πρόσθεν τῶν εἰσ τὴν πόλιν φερουσῶν πυλῶν·

ἔπειτα πολιορκούμενοι ὑπὸ τῶν προσβοηθούντων ἐχώρουν πάλιν πρὸσ τὴν ἀκρόπολιν· οἱ δὲ πολῖται συνεισπίπτουσιν αὐτοῖσ. τὸ μὲν οὖν μέσον τῆσ ἀκροπόλεωσ εὐθὺσ ἔρημον ἐγένετο· ἐπὶ δὲ τὸ τεῖχοσ καὶ τοὺσ πύργουσ ἀναβάντεσ οἱ πολέμιοι ἔπαιον καὶ ἔβαλλον τοὺσ ἔνδον· οἱ δὲ χαμόθεν ἠμύνοντο καὶ κατὰ τὰσ ἐπὶ τὸ τεῖχοσ φερούσασ κλίμακασ προσεμάχοντο. ἐπεὶ δὲ τῶν ἔνθεν καὶ ἔνθεν πύργων ἐκράτησάν τινων οἱ πολῖται, ὁμόσε δὴ ἐχώρουν ἀπονενοημένωσ τοῖσ ἀναβεβηκόσιν.

οἱ δὲ ὠθούμενοι ὑπ’ αὐτῶν τῇ τόλμῃ τε καὶ μάχῃ εἰσ ἔλαττον συνειλοῦντο. ἐν δὲ τούτῳ τῷ καιρῷ οἱ μὲν Ἀρκάδεσ καὶ οἱ Ἀργεῖοι περὶ τὴν πόλιν ἐκυκλοῦντο, καὶ κατὰ κεφαλὴν τὸ τεῖχοσ τῆσ ἀκροπόλεωσ διώρυττον· τῶν δ’ ἔνδοθεν οἱ μὲν ἐπὶ τὸ τεῖχοσ, οἱ δὲ καὶ ἔξωθεν ἔτι ἐπαναβαίνοντασ, ἐπὶ ταῖσ κλίμαξιν ὄντασ, ἔπαιον, οἱ δὲ πρὸσ τοὺσ ἀναβεβηκότασ αὐτῶν ἐπὶ τοὺσ πύργουσ ἐμάχοντο, καὶ πῦρ εὑρόντεσ ἐν ταῖσ σκηναῖσ ὑφῆπτον αὐτούσ, προσφοροῦντεσ τῶν δραγμάτων ἃ ἔτυχεν ἐξ αὐτῆσ τῆσ ἀκροπόλεωσ τεθερισμένα. ἐνταῦθα δὴ οἱ μὲν ἀπὸ τῶν πύργων τὴν φλόγα φοβούμενοι ἐξήλλοντο, οἱ δὲ ἐπὶ τῶν τειχῶν ὑπὸ τῶν ἀνδρῶν παιόμενοι ἐξέπιπτον. ἐπεὶ δ’ ἅπαξ ἤρξαντο ὑπείκειν, ταχὺ δὴ πᾶσα ἡ ἀκρόπολισ ἔρημοσ τῶν πολεμίων ἐγεγένητο.

εὐθὺσ δὲ καὶ οἱ ἱππεῖσ ἐξήλαυνον· οἱ δὲ πολέμιοι ἰδόντεσ αὐτοὺσ ἀπεχώρουν, καταλιπόντεσ τάσ τε κλίμακασ καὶ τοὺσ νεκρούσ, ἐνίουσ δὲ καὶ ζῶντασ ἀποκεχωλευμένουσ. ἀπέθανον δὲ τῶν πολεμίων οἵ τε ἔνδον μαχόμενοι καὶ οἱ ἔξω ἁλλόμενοι οὐκ ἐλάττουσ τῶν ὀγδοήκοντα. ἔνθα δὴ θεάσασθαι παρῆν ἐπὶ τῆσ σωτηρίασ τοὺσ μὲν ἄνδρασ δεξιουμένουσ ἀλλήλουσ, τὰσ δὲ γυναῖκασ πιεῖν τε φερούσασ καὶ ἅμα χαρᾷ δακρυούσασ· πάντασ δὲ τοὺσ παρόντασ τότε γε τῷ ὄντι κλαυσίγελωσ εἶχεν. ἐνέβαλον δὲ καὶ τῷ ὑστέρῳ ἔτει εἰσ τὸν Φλειοῦντα οἵ τε Ἀργεῖοι καὶ οἱ Ἀρκάδεσ ἅπαντεσ.

αἴτιον δ’ ἦν τοῦ ἐπικεῖσθαι αὐτοὺσ ἀεὶ τοῖσ Φλειασίοισ ὅτι ἅμα μὲν ὠργίζοντο αὐτοῖσ, ἅμα δὲ ἐν μέσῳ εἶχον, καὶ ἐν ἐλπίδι ἦσαν ἀεὶ διὰ τὴν ἀπορίαν τῶν ἐπιτηδείων παραστήσεσθαι αὐτούσ. οἱ δ’ ἱππεῖσ καὶ οἱ ἐπίλεκτοι τῶν Φλειασίων καὶ ἐν ταύτῃ τῇ ἐμβολῇ ἐπὶ τῇ διαβάσει τοῦ ποταμοῦ ἐπιτίθενται σὺν τοῖσ παροῦσι τῶν Ἀθηναίων ἱππεῦσι· καὶ κρατήσαντεσ ἐποίησαν τοὺσ πολεμίουσ τὸ λοιπὸν τῆσ ἡμέρασ ὑπὸ τὰσ ἀκρωρείασ ὑποχωρεῖν, ὥσπερ ἀπὸ φιλίου καρποῦ τοῦ ἐν τῷ πεδίῳ φυλαττομένουσ μὴ καταπατήσειαν. αὖθισ δέ ποτε ἐστράτευσεν εἰσ τὸν Φλειοῦντα ὁ ἐν τῷ Σικυῶνι ἄρχων Θηβαῖοσ, ἄγων οὕσ τε αὐτὸσ εἶχε φρουροὺσ καὶ Σικυωνίουσ καὶ Πελληνέασ·

ἤδη γὰρ τότε ἠκολούθουν τοῖσ Θηβαίοισ· καὶ Εὔφρων δὲ τοὺσ αὑτοῦ ἔχων μισθοφόρουσ περὶ δισχιλίουσ συνεστρατεύετο. οἱ μὲν οὖν ἄλλοι αὐτῶν διὰ τοῦ Τρικαράνου κατέβαινον ἐπὶ τὸ Ἥραιον, ὡσ τὸ πεδίον φθεροῦντεσ. κατὰ δὲ τὰσ εἰσ Κόρινθον φερούσασ πύλασ ἐπὶ τοῦ ἄκρου κατέλιπε Σικυωνίουσ τε καὶ Πελληνέασ, ὅπωσ μὴ ταύτῃ περιελθόντεσ οἱ Φλειάσιοι κατὰ κεφαλὴν αὐτῶν γένοιντο ὑπὲρ τοῦ Ἡραίου. ὡσ δ’ ἔγνωσαν οἱ ἐκ τῆσ πόλεωσ τοὺσ πολεμίουσ ἐπὶ τὸ πεδίον ὡρμημένουσ, ἀντεξελθόντεσ οἵ τε ἱππεῖσ καὶ οἱ ἐπίλεκτοι τῶν Φλειασίων ἐμάχοντο καὶ οὐκ ἀνίεσαν εἰσ τὸ πεδίον αὐτούσ.

καὶ τὸ μὲν πλεῖστον τῆσ ἡμέρασ ἐνταῦθα ἀκροβολιζόμενοι διῆγον, οἱ μὲν περὶ τὸν Εὔφρονα ἐπιδιώκοντεσ μέχρι τοῦ ἱππασίμου, οἱ δὲ ἔνδοθεν μέχρι τοῦ Ἡραίου. ἐπεὶ δὲ καιρὸσ ἐδόκει εἶναι, ἀπῇσαν οἱ πολέμιοι κύκλῳ τοῦ Τρικαράνου·

ὥστε γὰρ τὴν σύντομον πρὸσ τοὺσ Πελληνέασ ἀφικέσθαι ἡ πρὸ τοῦ τείχουσ φάραγξ εἶργε. μικρὸν δ’ αὐτοὺσ πρὸσ τὸ ὄρθιον προπέμψαντεσ οἱ Φλειάσιοι ἀποτρεπόμενοι ἱέντο τὴν παρὰ τὸ τεῖχοσ ἐπὶ τοὺσ Πελληνέασ καὶ τοὺσ μετ’ αὐτῶν. καὶ οἱ περὶ τὸν Θηβαῖον δὲ αἰσθόμενοι τὴν σπουδὴν τῶν Φλειασίων ἡμιλλῶντο ὅπωσ φθάσειαν τοῖσ Πελληνεῦσι βοηθήσαντεσ.

ἀφικόμενοι δὲ πρότεροι οἱ ἱππεῖσ ἐμβάλλουσι τοῖσ Πελληνεῦσι. δεξαμένων δὲ τὸ πρῶτον, ἐπαναχωρήσαντεσ πάλιν σὺν τοῖσ παραγεγενημένοισ τῶν πεζῶν ἐνέβαλον καὶ ἐκ χειρὸσ ἐμάχοντο. καὶ ἐκ τούτου δὴ ἐγκλίνουσιν οἱ πολέμιοι, καὶ ἀποθνῄσκουσι τῶν τε Σικυωνίων τινὲσ καὶ τῶν Πελληνέων μάλα πολλοὶ καὶ ἄνδρεσ ἀγαθοί. τούτων δὲ γενομένων οἱ μὲν Φλειάσιοι τροπαῖον ἵσταντο λαμπρὸν παιανίζοντεσ, ὥσπερ εἰκόσ·

οἱ δὲ περὶ τὸν Θηβαῖον καὶ τὸν Εὔφρονα περιεώρων ταῦτα, ὥσπερ ἐπὶ θέαν περιδεδραμηκότεσ. τούτων δὲ πραχθέντων, οἱ μὲν ἐπὶ Σικυῶνοσ ἀπῆλθον, οἱ δ’ εἰσ τὸ ἄστυ ἀπεχώρησαν. καλὸν δὲ καὶ τοῦτο διεπράξαντο οἱ Φλειάσιοι·

τὸν γὰρ Πελληνέα πρόξενον ζῶντα λαβόντεσ, καίπερ πάντων σπανιζόμενοι, ἀφῆκαν ἄνευ λύτρων. γενναίουσ μὲν δὴ καὶ ἀλκίμουσ πῶσ οὐκ ἄν τισ φαίη εἶναι τοὺσ τοιαῦτα διαπραττομένουσ; ὥσ γε μὴν καὶ διὰ καρτερίασ τὴν πίστιν τοῖσ φίλοισ διέσῳζον περιφανέσ·

οἳ ἐπεὶ εἴργοντο τῶν ἐκ τῆσ γῆσ καρπῶν, ἔζων τὰ μὲν ἐκ τῆσ πολεμίασ λαμβάνοντεσ, τὰ δὲ ἐκ Κορίνθου ὠνούμενοι, διὰ πολλῶν κινδύνων ἐπὶ τὴν ἀγορὰν ἰόντεσ, χαλεπῶσ μὲν τιμὴν πορίζοντεσ, χαλεπῶσ δὲ τοὺσ πορίζοντασ διαπραττόμενοι, γλίσχρωσ δ’ ἐγγυητὰσ καθιστάντεσ τῶν ἀξόντων ὑποζυγίων. ἤδη δὲ παντάπασιν ἀποροῦντεσ Χάρητα διεπράξαντο σφίσι παραπέμψαι τὴν παραπομπήν.

ἐπεὶ δὲ ἐν Φλειοῦντι ἐγένοντο, ἐδεήθησαν αὐτοῦ καὶ τοὺσ ἀχρείουσ συνεκπέμψαι εἰσ τὴν Πελλήνην. κἀκείνουσ μὲν ἐκεῖ κατέλιπον, ἀγοράσαντεσ δὲ καὶ ἐπισκευασάμενοι ὁπόσα ἐδύναντο ὑποζύγια νυκτὸσ ἀπῇσαν, οὐκ ἀγνοοῦντεσ ὅτι ἐνεδρεύσοιντο ὑπὸ τῶν πολεμίων, ἀλλὰ νομίζοντεσ χαλεπώτερον εἶναι τοῦ μάχεσθαι τὸ μὴ ἔχειν τἀπιτήδεια. καὶ προῇσαν μὲν οἱ Φλειάσιοι μετὰ Χάρητοσ·

ἐπεὶ δὲ ἐνέτυχον τοῖσ πολεμίοισ, εὐθὺσ ἔργου τε εἴχοντο καὶ παρακελευσάμενοι ἀλλήλοισ ἐνέκειντο, καὶ ἅμα Χάρητα ἐπιβοηθεῖν ἐβόων. νίκησ δὲ γενομένησ καὶ ἐκβληθέντων ἐκ τῆσ ὁδοῦ τῶν πολεμίων, οὕτω δὴ οἴκαδε καὶ ἑαυτοὺσ καὶ ἃ ἦγον ἀπέσωσαν. ὡσ δὲ τὴν νύκτα ἠγρύπνησαν, ἐκάθευδον μέχρι πόρρω τῆσ ἡμέρασ. ἐπεὶ δὲ ἀνέστη ὁ Χάρησ, προσελθόντεσ οἵ τε ἱππεῖσ καὶ οἱ χρησιμώτατοι τῶν ὁπλιτῶν ἔλεγον·

Ὦ Χάρησ, ἔξεστί σοι τήμερον κάλλιστον ἔργον διαπράξασθαι. χωρίον γὰρ ἐπὶ τοῖσ ὁρ́οισ ἡμῖν οἱ Σικυώνιοι τειχίζουσιν, οἰκοδόμουσ μὲν πολλοὺσ ἔχοντεσ, ὁπλίτασ δὲ οὐ πάνυ πολλούσ. ἡγησόμεθα μὲν οὖν ἡμεῖσ οἱ ἱππεῖσ καὶ τῶν ὁπλιτῶν οἱ ἐρρωμενέστατοι· σὺ δὲ τὸ ξενικὸν ἔχων ἐὰν ἀκολουθῇσ, ἴσωσ μὲν διαπεπραγμένα σοι καταλήψῃ, ἴσωσ δὲ ἐπιφανεὶσ σὺ τροπήν, ὥσπερ ἐν Πελλήνῃ, ποιήσεισ. εἰ δέ τι δυσχερέσ σοί ἐστιν ὧν λέγομεν, ἀνακοίνωσαι τοῖσ θεοῖσ θυόμενοσ· οἰόμεθα γὰρ ἔτι σε μᾶλλον ἡμῶν τοὺσ θεοὺσ ταῦτα πράττειν κελεύσειν. τοῦτο δὲ χρή, ὦ Χάρησ, εὖ εἰδέναι, ὅτι ἐὰν ταῦτα πράξῃσ, τοῖσ μὲν πολεμίοισ ἐπιτετειχικὼσ ἔσει, φιλίαν δὲ πόλιν διασεσωκώσ, εὐκλεέστατοσ δὲ ἐν τῇ πατρίδι ἔσει, ὀνομαστότατοσ δὲ καὶ ἐν τοῖσ συμμάχοισ καὶ πολεμίοισ. ὁ μὲν δὴ Χάρησ πεισθεὶσ ἐθύετο, τῶν δὲ Φλειασίων εὐθὺσ οἱ μὲν ἱππεῖσ τοὺσ θώρακασ ἐνεδύοντο καὶ τοὺσ ἵππουσ ἐχαλίνουν, οἱ δὲ ὁπλῖται ὅσα εἰσ πεζὸν παρεσκευάζοντο.

ἐπεὶ δὲ ἀναλαβόντεσ τὰ ὅπλα ἐπορεύοντο ἔνθα ἐθύετο, ἀπήντα αὐτοῖσ ὁ Χάρησ καὶ ὁ μάντισ, καὶ ἔλεγον ὅτι καλὰ τὰ ἱερά. ἀλλὰ περιμένετε, ἔφασαν· ἤδη γὰρ καὶ ἡμεῖσ ἔξιμεν. ὡσ δὲ τάχιστα ἐκηρύχθη, θείᾳ τινὶ προθυμίᾳ καὶ οἱ μισθοφόροι ταχὺ ἐξέδραμον. ἐπεὶ δὲ Χάρησ ἤρξατο πορεύεσθαι, προῇσαν αὐτοῦ οἱ τῶν Φλειασίων ἱππεῖσ καὶ πεζοί·

καὶ τὸ μὲν πρῶτον ταχέωσ ἡγοῦντο, ἔπειτα δὲ ἐτρόχαζον· τέλοσ δὲ οἱ μὲν ἱππεῖσ κατὰ κράτοσ ἤλαυνον, οἱ δὲ πεζοὶ κατὰ κράτοσ ἔθεον ὡσ δυνατὸν ἐν τάξει, οἷσ καὶ ὁ Χάρησ σπουδῇ ἐπηκολούθει. ἦν μὲν οὖν τῆσ ὡρ́ασ μικρὸν πρὸ δύντοσ ἡλίου· κατελάμβανον δὲ τοὺσ ἐν τῷ τείχει πολεμίουσ τοὺσ μὲν λουομένουσ, τοὺσ δ’ ὀψοποιουμένουσ, τοὺσ δὲ φυρῶντασ, τοὺσ δὲ στιβάδασ ποιουμένουσ. ὡσ δ’ εἶδον τὴν σφοδρότητα τῆσ ἐφόδου, εὐθὺσ ἐκπλαγέντεσ ἔφυγον, καταλιπόντεσ τοῖσ ἀγαθοῖσ ἀνδράσι πάντα τἀπιτήδεια.

κἀκεῖνοι μὲν ταῦτα δειπνήσαντεσ καὶ οἴκοθεν ἄλλα ἐλθόντα, ὡσ ἐπ’ εὐτυχίᾳ σπείσαντεσ καὶ παιανίσαντεσ καὶ φυλακὰσ κατασκευασάμενοι, κατέδαρθον. οἱ δὲ Κορίνθιοι, ἀφικομένου τῆσ νυκτὸσ ἀγγέλου περὶ τῆσ Θυαμίασ, μάλα φιλικῶσ κηρύξαντεσ τὰ ζεύγη καὶ τὰ ὑποζύγια πάντα καὶ σίτου γεμίσαντεσ εἰσ τὸν Φλειοῦντα παρήγαγον· καὶ ἑώσπερ ἐτειχίζετο τὸ τεῖχοσ, ἑκάστησ ἡμέρασ παραπομπαὶ ἐγίγνοντο.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Xenophon, Hellenica, Ἑλληνικῶν Ζ, chapter 2

(크세노폰, Hellenica, Ἑλληνικῶν Ζ, chapter 2)

상위

목록

SEARCH

MENU NAVIGATION