Strabo, Geography, book 15, chapter 3 36:

(스트라본, 지리학, book 15, chapter 3 36:)

ἀπὸ δὲ πέντε ἐτῶν ἑώσ τετάρτου καὶ εἰκοστοῦ παιδεύονται τοξεύειν καὶ ἀκοντίζειν καὶ ἱππάζεσθαι καὶ ἀληθεύειν, διδασκάλοισ τε λόγων τοῖσ σωφρονεστάτοισ χρῶνται, οἳ καὶ τὸ μυθῶδεσ πρὸσ τὸ συμφέρον ἀνάγοντεσ παραπλέκουσι, καὶ μέλουσ χωρὶσ καὶ μετ’ ᾠδῆσ ἔργα θεῶν τε καὶ ἀνδρῶν τῶν ἀρίστων ἀναδιδόντεσ. συνάγουσι δ’ εἰσ ἕνα τόπον, ψόφῳ χαλκοῦ πρὸ ὄρθρου διεγείροντεσ ὡσ ἐπὶ ἐξοπλισίαν ἢ θήραν· τάξαντεσ δ’ ἀνὰ πεντήκοντα ἡγεμόνα τῶν βασιλέωσ τινὰ παίδων αὐτοῖσ ἢ σατράπου τρέχοντι κελεύουσιν ἕπεσθαι, χωρίον ἀφορίσαντεσ τριάκοντα ἢ τετταράκοντα σταδίων. ἀπαιτοῦσι δὲ καὶ λόγον ἑκάστου μαθήματοσ, ἅμα καὶ μεγαλοφωνίαν καὶ πνεῦμα καὶ πλευρὰν ἀσκοῦντεσ, καὶ πρὸσ καῦμα δὲ καὶ πρὸσ ψῦχοσ καὶ ὄμβρουσ καὶ χειμάρρων διαβάσεισ ὥστ’ ἄβροχα φυλάττειν καὶ ὅπλα καὶ ἐσθῆτα, καὶ ποιμαίνειν δὲ καὶ ἀγραυλεῖν καὶ καρποῖσ ἀγρίοισ χρῆσθαι, τερμίνθῳ δρυοβαλάνοισ ἀχράδι. ἡ δὲ καθ’ ἡμέραν δίαιτα ἄρτοσ μετὰ τὸ γυμνάσιον καὶ μᾶζα καὶ κάρδαμον καὶ ἁλῶν χόνδροσ καὶ κρέα ὀπτὰ ἢ ἑφθὰ ἐξ ὕδατοσ, ποτὸν δ’ ὕδωρ. θηρεύουσι δὲ σαύνια ἀφ’ ἵππων βάλλοντεσ καὶ τοξεύματα καὶ σφενδονῶντεσ. δείλησ δὲ φυτουργεῖν καὶ ῥιζοτομεῖν ἀσκοῦσι καὶ ὁπλοποιεῖν καὶ λίνα καὶ ἄρκυσ φιλοτεχνεῖν. οὐχ ἅπτονται δὲ τῶν θηρευμάτων οἱ παῖδεσ, ἀλλὰ κομίζειν οἴκαδε ἔθοσ. τίθεται δ’ ὑπὸ τοῦ βασιλέωσ ἆθλα δρόμου καὶ τῶν [ἄλλων τῶν] ἐν τοῖσ πεντάθλοισ. κοσμοῦνται δ’ οἱ παῖδεσ χρυσῷ, τὸ πυρωπὸν τιθεμένων ἐν τιμῇ· διὸ οὐδὲ νεκρῷ προσφέρουσι καθάπερ οὐδὲ τὸ πῦρ κατὰ τιμήν.

상위

Geography (지리학)

목록

일치하는 문장이 없습니다.

SEARCH

MENU NAVIGATION