Plutarch, De liberis educandis, section 12

(플루타르코스, De liberis educandis, section 12)

κἀκεῖνό φημι, δεῖν τοὺσ παῖδασ ἐπὶ τὰ καλὰ τῶν ἐπιτηδευμάτων ἄγειν παραινέσεσι καὶ λόγοισ, μὴ μὰ Δία πληγαῖσ μηδ’ αἰκισμοῖσ. δοκεῖ γάρ που ταῦτα τοῖσ δούλοισ μᾶλλον ἢ τοῖσ ἐλευθέροισ πρέπειν· ἀποναρκῶσι γὰρ καὶ φρίττουσι πρὸσ τοὺσ πόνουσ, τὰ μὲν διὰ τὰσ ἀλγηδόνασ τῶν πληγῶν, τὰ δὲ καὶ διὰ τὰσ ὕβρεισ.

ἔπαινοι δὲ καὶ ψόγοι πάσησ εἰσὶν αἰκίασ ὠφελιμώτεροι τοῖσ ἐλευθέροισ, οἱ μὲν ἐπὶ τὰ καλὰ παρορμῶντεσ οἱ δ’ ἀπὸ τῶν αἰσχρῶν ἀνείργοντεσ.

δεῖ δ’ ἐναλλάξ καὶ ποικίλωσ χρῆσθαι ταῖσ ἐπιπλήξεσι καὶ τοῖσ ἐπαίνοισ, κἀπειδάν ποτε θρασύνωνται, ταῖσ ἐπιπλήξεσιν ἐν αἰσχύνῃ ποιεῖσθαι, καὶ πάλιν ἀνακαλεῖσθαι τοῖσ ἐπαίνοισ καὶ μιμεῖσθαι τὰσ τίτθασ, αἵτινεσ ἐπειδὰν τὰ παιδία κλαυθμυρίσωσιν, εἰσ παρηγορίαν πάλιν τὸν μαστὸν ὑπέχουσι.

δεῖ δ’ αὐτοὺσ μηδὲ τοῖσ ἐγκωμίοισ ἐπαίρειν καὶ φυσᾶν·

χαυνοῦνται γὰρ ταῖσ ὑπερβολαῖσ τῶν ἐπαίνων καὶ θρύπτονται.

일치하는 문장이 없습니다.

SEARCH

MENU NAVIGATION