Plato, Cratylus, Theaetetus, Sophist, Statesman, Σοφιστής? 56:

οὐδέν. τὸ δέ γε περὶ τὰς ἀμφισβητήσεις θετέον διττόν. πῇ· καθ ὅσον μὲν γὰρ γίγνεται μήκεσί τε πρὸς ἐναντία μήκη λόγων καὶ περὶ τὰ δίκαια καὶ ἄδικα δημοσίᾳ, δικανικόν. ναί. τὸ δ ἐν ἰδίοις αὖ καὶ κατακεκερματισμένον ἐρωτήσεσι πρὸς ἀποκρίσεις μῶν εἰθίσμεθα καλεῖν ἄλλο πλὴν ἀντιλογικόν· οὐδέν. τοῦ δὲ ἀντιλογικοῦ τὸ μὲν ὅσον περὶ τὰ συμβόλαια ἀμφισβητεῖται μέν, εἰκῇ δὲ καὶ ἀτέχνως περὶ αὐτὸ πράττεται, ταῦτα θετέον μὲν εἶδος, ἐπείπερ αὐτὸ διέγνωκεν ὡς ἕτερον ὀ`ν ὁ λόγος, ἀτὰρ ἐπωνυμίας οὔθ ὑπὸ τῶν ἔμπροσθεν ἔτυχεν οὔτε νῦν ὑφ ἡμῶν τυχεῖν ἄξιον.