Apollodorus, Library and Epitome, book 1, chapter 9 26:

(아폴로도로스, Library and Epitome, book 1, chapter 9 26:)

πλέοντεσ δὲ νυκτὸσ σφοδρῷ περιπίπτουσι χειμῶνι. Ἀπόλλων δὲ στὰσ ἐπὶ τὰσ Μελαντίουσ δειράσ, τοξεύσασ τῷ βέλει εἰσ τὴν θάλασσαν κατήστραψεν. οἱ δὲ πλησίον ἐθεάσαντο νῆσον, τῷ δὲ παρὰ προσδοκίαν ἀναφανῆναι προσορμισθέντεσ Ἀνάφην ἐκάλεσαν· ἱδρυσάμενοι δὲ βωμὸν Ἀπόλλωνοσ αἰγλήτου καὶ θυσιάσαντεσ ἐπ’ εὐωχίαν ἐτράπησαν. δοθεῖσαι δ’ ὑπὸ Ἀρήτησ Μηδείᾳ δώδεκα θεράπαιναι τοὺσ ἀριστέασ ἔσκωπτον μετὰ παιγνίασ· ὅθεν ἔτι καὶ νῦν ἐν τῇ θυσίᾳ σύνηθέσ ἐστι σκώπτειν ταῖσ γυναιξίν. ἐντεῦθεν ἀναχθέντεσ κωλύονται Κρήτῃ προσίσχειν ὑπὸ Τάλω. τοῦτον οἱ μὲν τοῦ χαλκοῦ γένουσ εἶναι λέγουσιν, οἱ δὲ ὑπὸ Ἡφαίστου Μίνωι δοθῆναι· ὃσ ἦν χαλκοῦσ ἀνήρ, οἱ δὲ ταῦρον αὐτὸν λέγουσιν. εἶχε δὲ φλέβα μίαν ἀπὸ αὐχένοσ κατατείνουσαν ἄχρι σφυρῶν· κατὰ δὲ τὸ τέρμα τῆσ φλεβὸσ ἧλοσ διήρειστο χαλκοῦσ. οὗτοσ ὁ Τάλωσ τρὶσ ἑκάστησ ἡμέρασ τὴν νῆσον περιτροχάζων ἐτήρει· διὸ καὶ τότε τὴν Ἀργὼ προσπλέουσαν θεωρῶν τοῖσ λίθοισ ἔβαλλεν. ἐξαπατηθεὶσ δὲ ὑπὸ Μηδείασ ἀπέθανεν, ὡσ μὲν ἔνιοι λέγουσι, διὰ φαρμάκων αὐτῷ μανίαν Μηδείασ ἐμβαλούσησ, ὡσ δέ τινεσ, ὑποσχομένησ ποιήσειν ἀθάνατον καὶ τὸν ἧλον ἐξελούσησ, ἐκρυέντοσ τοῦ παντὸσ ἰχῶροσ αὐτὸν ἀποθανεῖν. τινὲσ δὲ αὐτὸν τοξευθέντα ὑπὸ Ποίαντοσ εἰσ τὸ σφυρὸν τελευτῆσαι λέγουσι. μίαν δὲ ἐνταῦθα νύκτα μείναντεσ Αἰγίνῃ προσίσχουσιν ὑδρεύσασθαι θέλοντεσ, καὶ γίνεται περὶ τῆσ ὑδρείασ αὐτοῖσ ἅμιλλα. ἐκεῖθεν δὲ διὰ τῆσ Εὐβοίασ καὶ τῆσ Λοκρίδοσ πλεύσαντεσ εἰσ Ιὠλκὸν ἦλθον, τὸν πάντα πλοῦν ἐν τέτταρσι μησὶ τελειώσαντεσ.

일치하는 문장이 없습니다.

SEARCH

MENU NAVIGATION