Xenophon, Cyropaedia, Κύρου Παιδείασ Ε, chapter 3 68:

τὴν μὲν δὴ νύκτα οὕτωσ ἐπορεύοντο· ἐπεὶ δὲ ἡμέρα ἐγένετο, τοὺσ μὲν Καδουσίων ἱππέασ, ὅτι αὐτῶν καὶ οἱ πεζοὶ ἐπορεύοντο ἔσχατοι, παρὰ τούτοισ κατέλιπεν, ὡσ μηδ’ οὗτοι ψιλοὶ ἱππέων ἰοιέν· τοὺσ δ’ ἄλλουσ εἰσ τὸ πρόσθεν παρελαύνειν ἐκέλευσεν, ὅτι καὶ οἱ πολέμιοι ἐν τῷ πρόσθεν ἦσαν, ὅπωσ εἴ τί που ἐναντιοῖτο αὐτῷ, ἀπαντῴη ἔχων τὴν ἰσχὺν ἐν τάξει καὶ μάχοιτο, εἴ τέ τί που φεῦγον ὀφθείη, ὡσ ἐξ ἑτοιμοτάτου διώκοι.