Plato, Parmenides, Philebus, Symposium, Phaedrus, Παρμενίδης 53:

οὐδαμῶσ, φάναι τὸν Σωκράτη, ἀλλὰ ταῦτα μέν γε ἅπερ ὁρῶμεν, ταῦτα καὶ εἶναι· εἶδοσ δέ τι αὐτῶν οἰηθῆναι εἶναι μὴ λίαν ᾖ ἄτοπον. ἤδη μέντοι ποτέ με καὶ ἔθραξε μή τι ᾖ περὶ πάντων ταὐτόν· ἔπειτα ὅταν ταύτῃ στῶ, φεύγων οἴχομαι, δείσασ μή ποτε εἴσ τινα βυθὸν φλυαρίασ ἐμπεσὼν διαφθαρῶ· ἐκεῖσε δ’ οὖν ἀφικόμενοσ, εἰσ ἃ νυνδὴ ἐλέγομεν εἴδη ἔχειν, περὶ ἐκεῖνα πραγματευόμενοσ διατρίβω.