Euripides, Phoenissae, choral, strophe 1

ὦ πολύμοχθοσ Ἄρησ, τί ποθ’ αἵματι καὶ θανάτῳ κατέχῃ Βρομίου παράμουσοσ ἑορταῖσ; οὐκ ἐπὶ καλλιχόροισ στεφάνοισι νεάνιδοσ ὡρ́ασ βόστρυχον ἀμπετάσασ λωτοῦ κατὰ πνεύματα μέλπῃ μοῦσαν, ἐν ᾇ χάριτεσ χοροποιοί, ἀλλὰ σὺν ὁπλοφόροισ στρατὸν Ἀργείων ἐπιπνεύσασ αἵματι Θήβασ κῶμον ἀναυλότατον προχορεύεισ. οὐδ’ ὑπὸ θυρσομανεῖ νεβρίδων μέτα δίνᾳ, ἁρ́μασι καὶ ψαλίων τετραβάμοσι μωνυχοπώλων ἱππείαισ ἐπὶ χεύμασι βαίνων Ἰσμηνοῖο θοάζεισ, Ἀργείοισ ἐπιπνεύσασ Σπαρτῶν γένναν, ἀσπιδοφέρμονα θίασον ἐνόπλιον, ἀντίπαλον κατὰ λάινα τείχεα χαλκῷ κοσμήσασ. ἦ δεινά τισ Ἔρισ θεόσ, ἃ τάδε μήσατο πήματα γᾶσ βασιλεῦσιν, Λαβδακίδαισ πολυμόχθοισ.