Xenophon, Minor Works, Λακεδαιμονίων Πολιτεία, chapter 10

(크세노폰, Minor Works, Λακεδαιμονίων Πολιτεία, chapter 10)

καλῶσ δέ μοι δοκεῖ ὁ Λυκοῦργοσ νομοθετῆσαι καὶ ᾗ μέχρι γήρωσ ἀσκοῖτ’ ἂν ἀρετή. ἐπὶ γὰρ τῷ τέρματι τοῦ βίου τὴν κρίσιν τῆσ γεροντίασ προσθεὶσ ἐποίησε μηδὲ ἐν τῷ γήρᾳ ἀμελεῖσθαι τὴν καλοκἀγαθίαν. ἀξιάγαστον δ’ αὐτοῦ καὶ τὸ ἐπικουρῆσαι τῷ τῶν ἀγαθῶν γήρᾳ·

θεὶσ γὰρ τοὺσ γέροντασ κυρίουσ τοῦ περὶ τῆσ ψυχῆσ ἀγῶνοσ διέπραξεν ἐντιμότερον εἶναι τὸ γῆρασ τῆσ τῶν ἀκμαζόντων ῥώμησ. εἰκότωσ δέ τοι καὶ σπουδάζεται οὗτοσ ὁ ἀγὼν μάλιστα τῶν ἀνθρωπίνων.

καλοὶ μὲν γὰρ καὶ οἱ γυμνικοί· ἀλλ’ οὗτοι μὲν σωμάτων εἰσίν· ὁ δὲ περὶ τῆσ γεροντίασ ἀγὼν ψυχῶν ἀγαθῶν κρίσιν παρέχει. ὅσῳ οὖν κρείττων ψυχὴ σώματοσ, τοσούτῳ καὶ οἱ ἀγῶνεσ οἱ τῶν ψυχῶν ἢ οἱ τῶν σωμάτων ἀξιοσπουδαστότεροι. τόδε γε μὴν τοῦ Λυκούργου πῶσ οὐ μεγάλωσ ἄξιον ἀγασθῆναι;

ὃσ ἐπειδὴ κατέμαθεν ὅτι ὅπου οἱ βουλόμενοι ἐπιμελοῦνται τῆσ ἀρετῆσ οὐχ ἱκανοί εἰσι τὰσ πατρίδασ αὔξειν, ἐκεῖνοσ ἐν τῇ Σπάρτῃ ἠνάγκασε δημοσίᾳ πάντασ πάσασ ἀσκεῖν τὰσ ἀρετάσ. ὥσπερ οὖν οἱ ἰδιῶται τῶν ἰδιωτῶν διαφέρουσιν ἀρετῇ οἱ ἀσκοῦντεσ τῶν ἀμελούντων, οὕτω καὶ ἡ Σπάρτη εἰκότωσ πασῶν τῶν πόλεων ἀρετῇ διαφέρει, μόνη δημοσίᾳ ἐπιτηδεύουσα τὴν καλοκἀγαθίαν. οὐ γὰρ κἀκεῖνο καλόν, τὸ τῶν ἄλλων πόλεων κολαζουσῶν ἤν τίσ τι ἕτεροσ ἕτερον ἀδικῇ, ἐκεῖνον ζημίασ μὴ ἐλάττουσ ἐπιθεῖναι εἴ τισ φανερὸσ εἰή ἀμελῶν τοῦ ὡσ βέλτιστοσ εἶναι;

ἐνόμιζε γάρ, ὡσ ἐοίκεν, ὑπὸ μὲν τῶν ἀνδραποδιζομένων τινὰσ ἢ ἀποστερούντων τι ἢ κλεπτόντων τοὺσ βλαπτομένουσ μόνον ἀδικεῖσθαι, ὑπὸ δὲ τῶν κακῶν καὶ ἀνάνδρων ὅλασ τὰσ πόλεισ προδίδοσθαι.

ὥστε εἰκότωσ ἔμοιγε δοκεῖ τούτοισ μεγίστασ ζημίασ ἐπιθεῖναι. ἐπέθηκε δὲ καὶ τὴν ἀνυπόστατον ἀνάγκην ἀσκεῖν ἅπασαν πολιτικὴν ἀρετήν.

τοῖσ μὲν γὰρ τὰ νόμιμα ἐκτελοῦσιν ὁμοίωσ ἅπασι τὴν πόλιν οἰκείαν ἐποίησε, καὶ οὐδὲν ὑπελογίσατο οὔτε σωμάτων οὔτε χρημάτων ἀσθένειαν· εἰ δέ τισ ἀποδειλιάσειε τοῦ τὰ νόμιμα διαπονεῖσθαι, τοῦτον ἐκεῖνοσ ἀπέδειξε μηδὲ νομίζεσθαι ἔτι τῶν ὁμοίων εἶναι. ἀλλὰ γὰρ ὅτι μὲν παλαιότατοι οὗτοι οἱ νόμοι εἰσί, σαφέσ·

ὁ γὰρ Λυκοῦργοσ κατὰ τοὺσ Ἡρακλείδασ λέγεται γενέσθαι· οὕτω δὲ παλαιοὶ ὄντεσ ἔτι καὶ νῦν τοῖσ ἄλλοισ καινότατοί εἰσι· καὶ γὰρ τὸ πάντων θαυμαστότατον ἐπαινοῦσι μὲν πάντεσ τὰ τοιαῦτα ἐπιτηδεύματα, μιμεῖσθαι δὲ αὐτὰ οὐδεμία πόλισ ἐθέλει.

SEARCH

MENU NAVIGATION