Xenophon, Minor Works, Λακεδαιμονίων Πολιτεία, chapter 7

(크세노폰, Minor Works, Λακεδαιμονίων Πολιτεία, chapter 7)

ἐναντία γε μὴν καὶ τάδε τοῖσ ἄλλοισ Ἕλλησι κατέστησεν ὁ Λυκοῦργοσ ἐν τῇ Σπάρτῃ νόμιμα. ἐν μὲν γὰρ δήπου ταῖσ ἄλλαισ πόλεσι πάντεσ χρηματίζονται ὅσον δύνανται· ὁ μὲν γὰρ γεωργεῖ, ὁ δὲ ναυκληρεῖ, ὁ δ’ ἐμπορεύεται, οἱ δὲ καὶ ἀπὸ τεχνῶν τρέφονται· ἐν δὲ τῇ Σπάρτῃ ὁ Λυκοῦργοσ τοῖσ μὲν ἐλευθέροισ τῶν μὲν ἀμφὶ χρηματισμὸν ἀπεῖπε μηδενὸσ ἅπτεσθαι, ὅσα δὲ ἐλευθερίαν ταῖσ πόλεσι παρασκευάζει, ταῦτα ἔταξε μόνα ἔργα αὑτῶν νομίζειν.

καὶ γὰρ δὴ τί πλοῦτοσ ἐκεῖ γε σπουδαστέοσ, ἔνθα ἴσα μὲν φέρειν εἰσ τὰ ἐπιτήδεια, ὁμοίωσ δὲ διαιτᾶσθαι τάξασ ἐποίησε μὴ ἡδυπαθείασ ἕνεκα χρημάτων ὀρέγεσθαι;

ἀλλὰ μὴν οὐδ’ ἱματίων γε ἕνεκα χρηματιστέον· οὐ γὰρ ἐσθῆτοσ πολυτελείᾳ ἀλλὰ σώματοσ εὐεξίᾳ κοσμοῦνται. οὐδὲ μὴν τοῦ γε εἰσ τοὺσ συσκήνουσ ἕνεκα ἔχειν δαπανᾶν χρήματα ἁθροιστέον, ἐπεὶ τὸ τῷ σώματι πονοῦντα ὠφελεῖν τοὺσ συνόντασ εὐδοξότερον ἐποίησεν ἢ τὸ δαπανῶντα, ἐπιδείξασ τὸ μὲν ψυχῆσ, τὸ δὲ πλούτου ἔργον.

τό γε μὴν ἐξ ἀδίκων χρηματίζεσθαι καὶ ἐν τοῖσ τοιούτοισ διεκώλυσε.

πρῶτον μὲν γὰρ νόμισμα τοιοῦτον κατεστήσατο, ὃ δεκάμνων μόνον ἂν εἰσ οἰκίαν εἰσελθὸν οὔποτε δεσπότασ οὐδὲ οἰκέτασ λάθοι· καὶ γὰρ χώρασ μεγάλησ καὶ ἁμάξησ ἀγωγῆσ δέοιτ’ ἄν. χρυσίον γε μὴν καὶ ἀργύριον ἐρευνᾶται, καὶ ἄν τί που φανῇ, ὁ ἔχων ζημιοῦται.

τί οὖν ἂν ἐκεῖ χρηματισμὸσ σπουδάζοιτο, ἔνθα ἡ κτῆσισ πλείουσ λύπασ ἢ ἡ χρῆσισ εὐφροσύνασ παρέχει;

SEARCH

MENU NAVIGATION