Xenophon, Cyropaedia, Κύρου Παιδείασ Ε, chapter 2 8:

ἐπειδὴ δὲ ἔνδον ἦσαν, ἐκφέρων ὁ Γωβρύασ φιάλασ χρυσᾶσ καὶ πρόχουσ καὶ κάλπιδασ καὶ κόσμον παντοῖον καὶ δαρεικοὺσ ἀμέτρουσ τινὰσ καὶ πάντα καλὰ πολλά, τέλοσ τὴν θυγατέρα, δεινόν τι κάλλοσ καὶ μέγεθοσ, πενθικῶσ δ’ ἔχουσαν τοῦ ἀδελφοῦ τεθνηκότοσ, ἐξάγων ὧδ’ εἶπεν· ἐγώ σοι, ὦ Κῦρε, τὰ μὲν χρήματα ταῦτα δωροῦμαι, τὴν δὲ θυγατέρα ταύτην ἐπιτρέπω διαθέσθαι ὅπωσ ἂν σὺ βούλῃ· ἱκετεύομεν δέ, ἐγὼ μὲν καὶ πρόσθεν τοῦ υἱοῦ, αὕτη δὲ νῦν τοῦ ἀδελφοῦ τιμωρὸν γενέσθαι σε.