Strabo, Geography, book 5, chapter 4 14:

(스트라본, 지리학, book 5, chapter 4 14:)

μετὰ δὲ Δικαιάρχειάν ἐστι Νεάπολισ Κυμαίων ὕστερον δὲ καὶ Χαλκιδεῖσ ἐπῴκησαν καὶ Πιθηκουσσαίων τινὲσ καὶ Ἀθηναίων, ὥστε καὶ Νεάπολισ ἐκλήθη διὰ τοῦτο, ὅπου δείκνυται μνῆμα τῶν Σειρήνων μιᾶσ Παρθενόπησ, καὶ ἀγὼν συντελεῖται γυμνικὸσ κατὰ μαντείαν. ὕστερον δὲ Καμπανῶν τινασ ἐδέξαντο συνοίκουσ διχοστατήσαντεσ, καὶ ἠναγκάσθησαν τοῖσ ἐχθίστοισ ὡσ οἰκειοτάτοισ χρήσασθαι, ἐπειδὴ τοὺσ οἰκείουσ ἀλλοτρίουσ ἔσχον. μηνύει δὲ τὰ τῶν δημάρχων ὀνόματα τὰ μὲν πρῶτα Ἑλληνικὰ ὄντα, τὰ δ’ ὕστερα τοῖσ Ἑλληνικοῖσ ἀναμὶξ τὰ Καμπανικά. πλεῖστα δ’ ἴχνη τῆσ Ἑλληνικῆσ ἀγωγῆσ ἐνταῦθα σώζεται, γυμνάσιά τε καὶ ἐφηβεῖα καὶ φρατρίαι καὶ ὀνόματα Ἑλληνικὰ καίπερ ὄντων Ῥωμαίων. νυνὶ δὲ πεντετηρικὸσ ἱερὸσ ἀγὼν συντελεῖται παρ’ αὐτοῖσ μουσικόσ τε καὶ γυμνικὸσ ἐπὶ πλείουσ ἡμέρασ, ἐνάμιλλοσ τοῖσ ἐπιφανεστάτοισ τῶν κατὰ τὴν Ἑλλάδα. ἔστι δὲ καὶ ἐνθάδε διῶρυξ κρυπτή, τοῦ μεταξὺ ὄρουσ τῆσ τε Δικαιαρχείασ καὶ τῆσ Νεαπόλεωσ ὑπεργασθέντοσ ὁμοίωσ ὥσπερ ἐπὶ τὴν Κύμην, ὁδοῦ τε ἀνοιχθείσησ ἐναντίοισ ζεύγεσι πορευτῆσ ἐπὶ πολλοὺσ σταδίουσ· τὰ δὲ φῶτα ἐκ τῆσ ἐπιφανείασ τοῦ ὄρουσ, πολλαχόθεν ἐκκοπεισῶν θυρίδων, διὰ βάθουσ πολλοῦ κατάγεται. ἔχει δὲ καὶ ἡ Νεάπολισ θερμῶν ὑδάτων ἐκβολὰσ καὶ κατασκευὰσ λουτρῶν οὐ χείρουσ τῶν ἐν Βαίαισ, πολὺ δὲ τῷ πλήθει λειπομένασ· ἐκεῖ γὰρ ἄλλη πόλισ γεγένηται, συνῳκοδομημένων βασιλείων ἄλλων ἐπ’ ἄλλοισ, οὐκ ἐλάττων τῆσ Δικαιαρχείασ. ἐπιτείνουσι δὲ τὴν ἐν Νεαπόλει διαγωγὴν τὴν Ἑλληνικὴν οἱ ἐκ τῆσ Ῥώμησ ἀναχωροῦντεσ δεῦρο ἡσυχίασ χάριν τῶν ἀπὸ παιδείασ ἐργασαμένων ἢ καὶ ἄλλων διὰ γῆρασ ἢ ἀσθένειαν ποθούντων ἐν ἀνέσει ζῆν· καὶ τῶν Ῥωμαίων δ’ ἔνιοι χαίροντεσ τῷ βίῳ τούτῳ, θεωροῦντεσ τὸ πλῆθοσ τῶν ἀπὸ τῆσ αὐτῆσ ἀγωγῆσ ἐπιδημούντων ἀνδρῶν, ἄσμενοι φιλοχωροῦσι καὶ ζῶσιν αὐτόθι.

상위

Geography (지리학)

목록

일치하는 문장이 없습니다.

SEARCH

MENU NAVIGATION