Lucian, (no name) 6:

ἐξελθόντασ δὲ ὑποδέχεται ἠρέμα χλιαινόμενοσ οἶκοσ οὐκ ἀπηνεῖ τῇ θέρμῃ προαπαντῶν, ἐπιμήκησ, ἀμφιστρόγγυλοσ, μεθ’ ὃν ἐν δεξιᾷ οἶκοσ εὖ μάλα φαιδρόσ, ἀλείψασθαι προσηνῶσ παρεχόμενοσ, ἑκατέρωθεν εἰσόδουσ ἔχων Φρυγίῳ λίθῳ κεκαλλωπισμένασ, τοὺσ ἀπὸ παλαίστρασ εἰσιόντασ δεχόμενοσ. εἶτ’ ἐπὶ τούτῳ ἄλλοσ οἶκοσ οἴκων ἁπάντων κάλλιστοσ, στῆναί τε καὶ ἐγκαθίζεσθαι προσηνέστατοσ καὶ ἐμβραδῦναι ἀβλαβέστατοσ καὶ ἐγκυλίσασθαι ὠφελιμώτατοσ, Φρυγίου καὶ αὐτὸσ εἰσ ὀροφὴν ἄκραν ἀποστίλβων. ἑξῆσ δὲ ὁ θερμὸσ ὑποδέχεται διάδρομοσ Νομάδι λίθῳ διακεκολλημένοσ. ὁ δὲ ἔνδον οἶκοσ κάλλιστοσ, φωτὸσ τε πολλοῦ ἀνάμεστοσ καὶ ὡσ πορφύρᾳ διηνθισμένοσ. τρεῖσ καὶ οὗτοσ θερμὰσ πυέλουσ παρέχεται.