Galen, On the Natural Faculties., ΓΑΛΗΝΟΥ ΠΕΡΙ ΦΥΣΙΚΩΝ ΔΥΝΑΜΕΩΝ Α, section 16

(갈레노스, On the Natural Faculties., ΓΑΛΗΝΟΥ ΠΕΡΙ ΦΥΣΙΚΩΝ ΔΥΝΑΜΕΩΝ Α, section 16)

Ἐρασίστρατοσ δ’ οὐκ οἶδ’ ὅπωσ ἑτέραισ μέν τισι δόξαισ εὐήθεσιν ἀντεῖπε διὰ μακρῶν, ὑπερέβη δὲ τελέωσ τὴν Ἱπποκράτουσ, οὐδ’ ἄχρι τοῦ μνημονεῦσαι μόνον αὐτῆσ, ὡσ ἐν τοῖσ περὶ καταπόσεωσ ἐποίησεν, ἀξιώσασ. ἐν ἐκείνοισ μὲν γὰρ ἄχρι τοσούτου φαίνεται μνημονεύων, ὡσ τοὔνομ’ εἰπεῖν τῆσ ὁλκῆσ μόνον ὧδέ πωσ γράφων· "Ὁλκὴ μὲν οὖν τῆσ κοιλίασ οὐδεμία φαίνεται εἶναι"· περὶ δὲ τῆσ ἀναδόσεωσ τὸν λόγον ποιούμενοσ οὐδ’ ἄχρι συλλαβῆσ μιᾶσ ἐμνημόνευσε τῆσ Ἱπποκρατείου δόξησ. καίτοι γ’ ἐπήρκεσεν ἂν ἡμῖν, εἰ καὶ τοῦτ’ ἔγραψε μόνον, ὡσ Ἱπποκράτησ εἰπὼν "Σάρκεσ ὁλκοὶ καὶ ἐκ κοιλίησ καὶ ἔξωθεν" ψεύδεται· οὔτε γὰρ ἐκ τῆσ κοιλίασ οὔτ’ ἔξωθεν ἕλκειν δύνανται. εἰ δὲ καὶ ὅτι μήτρασ αἰτιώμενοσ ἄρρωστον αὐχένα κακῶσ εἶπεν "Οὐ γὰρ δύναται αὐτέησ ὁ στόμαχοσ εἰρύσαι τὴν γονήν," ἢ εἰ καί τι τοιοῦτον ἄλλο γράφειν ὁ Ἐρασίστρατοσ ἠξίωσε, τότ’ ἂν καὶ ἡμεῖσ πρὸσ αὐτὸν ἀπολογούμενοι εἴπομεν· ὦ γενναῖε, μὴ Ῥητορικῶσ ἡμῶν κατάτρεχε χωρὶσ ἀποδείξεωσ, ἀλλ’ εἰπέ τινα κατηγορίαν τοῦ δόγματοσ, ἵν’ ἢ πεισθῶμέν σοι ὡσ καλῶσ ἐξέλεγχοντι τὸν παλαιὸν λόγον ἢ μεταπείσωμεν ὡσ ἀγνοοῦντα. καίτοι τί λέγω Ῥητορικῶσ; μὴ γάρ, ἐπειδή τινεσ τῶν Ῥητόρων, ἃ μάλιστ’ ἀδυνατοῦσι διαλύεσθαι, ταῦτα διαγελάσαντεσ οὐδ’ ἐπιχειροῦσιν ἀντιλέγειν, ἤδη που τοῦτο καὶ ἡμεῖσ ἡγώμεθ’ εἶναι τὸ Ῥητορικῶσ· τὸ γὰρ διὰ λόγου πιθανοῦ ἐστι τὸ Ῥητορικῶσ, τὸ δ’ ἄνευ λόγου βωμολοχικόν, οὐ Ῥητορικόν. οὔκουν οὔτε Ῥητορικῶσ οὔτε διαλεκτικῶσ ἀντεῖπεν ὁ Ἐρασίστρατοσ ἐν τῷ περὶ τῆσ καταπόσεωσ λόγῳ. τί γάρ φησιν; "Ὁλκὴ μὲν οὖν τῆσ κοιλίασ οὐδεμία φαίνεται εἶναι. " πάλιν οὖν αὐτῷ παρ’ ἡμῶν ἀντιμαρτυρῶν ὁ αὐτὸσ λόγοσ ἀντιπαραβαλλέσθω· περιστολὴ μὲν οὖν τοῦ στομάχου οὐδεμία φαίνεται εἶναι. καὶ πῶσ οὐ φαίνεται; τάχ’ ἂν ἴσωσ εἴποι τισ τῶν ἀπ’ αὐτοῦ· τὸ γὰρ ἀεὶ τῶν ἄνωθεν αὐτοῦ μερῶν συστελλομένων διαστέλλεσθαι τὰ κάτω πῶσ οὐκ ἔστι τῆσ περιστολῆσ ἐνδεικτικόν; αὖθισ οὖν ἡμεῖσ, καὶ πῶσ οὐ φαίνεται, φήσομεν, ἡ τῆσ κοιλίασ ὁλκή; τὸ γὰρ ἀεὶ τῶν κάτωθεν μερῶν τοῦ στομάχου διαστελλομένων συστέλλεσθαι τὰ ἄνω πῶσ οὐκ ἔστι τῆσ ὁλκῆσ ἐνδεικτικόν; εἰ δὲ σωφρονήσειέ ποτε καὶ γνοίη τὸ φαινόμενον τοῦτο μηδὲν μᾶλλον τῆσ ἑτέρασ τῶν δοξῶν ὑπάρχειν ἐνδεικτικὸν ἀλλ’ ἀμφοτέρων εἶναι κοινόν, οὕτωσ ἂν ἤδη δείξαιμεν αὐτῷ τὴν ὀρθὴν ὁδὸν τῆσ τοῦ ἀληθοῦσ εὑρέσεωσ. ἀλλὰ περὶ μὲν τῆσ κοιλίασ αὖθισ. ἡ δὲ τῆσ τροφῆσ ἀνάδοσισ οὐδὲν δεῖται τῆσ πρὸσ τὸ κενούμενον ἀκολουθίασ ἅπαξ γε τῆσ ἑλκτικῆσ δυνάμεωσ ἐπὶ τῶν νεφρῶν ὡμολογημένησ, ἣν καίτοι πάνυ σαφῶσ ἀληθῆ γιγνώσκων ὑπάρχειν ὁ Ἐρασίστρατοσ οὔτ’ ἐμνημόνευσεν οὔτ’ ἀντεῖπεν οὔθ’ ὅλωσ ἀπεφήνατο, τίν’ ἔχει δόξαν ὑπὲρ τῆσ τῶν οὔρων διακρίσεωσ. ἢ διὰ τί προειπὼν εὐθὺσ κατ’ ἀρχὰσ τῶν καθ’ ὅλου λόγων, ὡσ ὑπὲρ τῶν φυσικῶν ἐνεργειῶν ἐρεῖ, πρῶτον τίνεσ τ’ εἰσὶ καὶ πῶσ γίγνονται καὶ διὰ τίνων τόπων, ἐπὶ τῆσ τῶν οὔρων διακρίσεωσ, ὅτι μὲν διὰ νεφρῶν, ἀπεφήνατο, τὸ δ’ ὅπωσ γίγνεται παρέλιπε; μάτην οὖν ἡμᾶσ καὶ περὶ τῆσ πέψεωσ ἐδίδαξεν, ὅπωσ γίγνεται, καὶ περὶ τῆσ τοῦ χολώδουσ περιττώματοσ διακρίσεωσ κατατρίβει. ἤρκει γὰρ εἰπεῖν κἀνταῦθα τὰ μόρια, δι’ ὧν γίγνεται, τὸ δ’ ὅπωσ παραλιπεῖν. ἀλλὰ περὶ μὲν ἐκείνων εἶχε λέγειν, οὐ μόνον δι’ ὧν ὀργάνων ἀλλὰ καὶ καθ’ ὅντινα γίγνεται τρόπον, ὥσπερ οἶμαι καὶ περὶ τῆσ ἀναδόσεωσ· οὐ γὰρ ἤρκεσεν εἰπεῖν αὐτῷ μόνον, ὅτι διὰ φλεβῶν, ἀλλὰ καὶ πῶσ ἐπεξῆλθεν, ὅτι τῇ πρὸσ τὸ κενούμενον ἀκολουθίᾳ· περὶ δὲ τῶν οὔρων τῆσ διακρίσεωσ, ὅτι μὲν διὰ νεφρῶν γίγνεται, γράφει, τὸ δ’ ὅπωσ οὐκέτι προστίθησιν. οὐδὲ γὰρ οἶμαι τῇ πρὸσ τὸ κενούμενον ἀκολουθίᾳ ἦν εἰπεῖν· οὕτω γὰρ ἂν οὐδεὶσ ὑπ’ ἰσχουρίασ ἀπέθανεν οὐδέποτε μὴ δυναμένου πλείονοσ ἐπιρρυῆναί ποτε παρὰ τὸ κενούμενον· ἄλλησ γὰρ αἰτίασ μηδεμιᾶσ προστεθείσησ, ἀλλὰ μόνησ τῆσ πρὸσ τὸ κενούμενον ἀκολουθίασ ποδηγούσησ τὸ συνεχέσ, οὐκ ἐγχωρεῖ πλέον ἐπιρρυῆναί ποτε τοῦ κενουμένου. ἀλλ’ οὐδ’ ἄλλην τινὰ προσθεῖναι πιθανὴν αἰτίαν εἶχεν, ὡσ ἐπὶ τῆσ ἀναδόσεωσ τὴν ἔκθλιψιν τῆσ γαστρόσ. ἀλλ’ αὕτη γ’ ἐπὶ τοῦ κατὰ τὴν κοίλην αἵματοσ ἀπωλώλει τελέωσ, οὐ τῷ μήκει μόνον τῆσ ἀποστάσεωσ ἐκλυθεῖσα, ἀλλὰ καὶ τῷ τὴν καρδίαν ὑπερκειμένην ἐξαρπάζειν αὐτῆσ σφοδρῶσ καθ’ ἑκάστην διαστολὴν οὐκ ὀλίγον αἷμα. μόνη δή τισ ἔτι καὶ πάντων ἔρημοσ ἀπελείπετο τῶν σοφισμάτων ἐν τοῖσ κάτω τῆσ κοίησ ἡ πρὸσ τὸ κενούμενον ἀκολουθία, διά τε τοὺσ ἐπὶ ταῖσ ἰσχουρίαισ ἀποθνήσκοντασ ἀπολωλεκυῖα τὴν πιθανότητα καὶ διὰ τὴν τῶν νεφρῶν θέσιν οὐδὲν ἧττον. εἰ μὲν γὰρ ἅπαν ἐπ’ αὐτοὺσ ἐφέρετο τὸ αἷμα, δεόντωσ ἄν τισ ἅπαν ἔφασκεν αὐτὸ καθαίρεσθαι. νυνὶ δέ, οὐ γὰρ ὅλον ἀλλὰ τοσοῦτον αὐτοῦ μέροσ, ὅσον αἱ μέχρι νεφρῶν δέχονται φλέβεσ, ἐπ’ αὐτοὺσ ἔρχεται, μόνον ἐκεῖνο καθαρθήσεται. καὶ τὸ μὲν ὀρρῶδεσ αὐτοῦ καὶ λεπτὸν οἱο͂ν δι’ ἠθμῶν τινων τῶν νεφρῶν διαδύσεται· τὸ δ’ αἱματῶδέσ τε καὶ παχὺ κατὰ τὰσ φλέβασ ὑπομένον ἐμποδὼν στήσεται τῷ κατόπιν ἐπιρρέοντι. παλινδρομεῖν οὖν αὐτὸ πρότερον ἐπὶ τὴν κοίλην ἀναγκαῖον καὶ κενὰσ οὕτωσ ἐργάζεσθαι τὰσ ἐπὶ τοὺσ νεφροὺσ ἰούσασ φλέβασ, αἳ δεύτερον οὐκέτι παρακομιοῦσιν ἐπ’ αὐτοὺσ ἀκάθαρτον αἷμα· κατειληφότοσ γὰρ αὐτὰσ τοῦ προτέρου πάροδοσ οὐδεμία λέλειπται. τίσ οὖν ἡμῖν ἡ δύναμισ ἀπάξει πάλιν ὀπίσω τῶν νεφρῶν τὸ καθαρὸν αἷμα; τίσ δὲ τοῦτο μὲν διαδεξαμένη κελεύσει πάλιν πρὸσ τὸ κάτω μέροσ ἰέναι τῆσ κοίλησ, ἑτέρῳ δ’ ἄνωθεν ἐπιφερομένῳ προστάξει, πρὶν ἐπὶ τοὺσ νεφροὺσ ἀπελθεῖν, μὴ φέρεσθαι κάτω; ταῦτ’ οὖν ἅπαντα συνιδὼν ὁ Ἐρασίστρατοσ ἀποριῶν μεστὰ καὶ μίαν μόνην δόξαν εὔπορον εὑρὼν ἐν ἅπασι τὴν τῆσ ὁλκῆσ, οὔτ’ ἀπορεῖσθαι βουλόμενοσ οὔτε τὴν Ἱπποκράτουσ ἐθέλων λέγειν ἄμεινον ὑπέλαβε σιωπητέον εἶναι περὶ τοῦ τρόπου τῆσ διακρίσεωσ. ἀλλ’ εἰ κἀκεῖνοσ ἐσίγησεν, ἡμεῖσ οὐ σιωπήσομεν· ἴσμεν γάρ, ὡσ οὐκ ἐνδέχεται παρελθόντα τὴν Ἱπποκράτειον δόξαν, εἶθ’ ἕτερόν τι περὶ νεφρῶν ἐνεργείασ εἰπόντα μὴ οὐ καταγέλαστον εἶναι παντάπασι. διὰ τοῦτ’ Ἐρασίστρατοσ μὲν ἐσιώπησεν, Ἀσκληπιάδησ δ’ ἐψεύσατο παραπλησίωσ οἰκέταισ λάλοισ μὲν τὰ πρόσθεν τοῦ βίου καὶ πολλὰ πολλάκισ ἐγκλήματα διαλυσαμένοισ ὑπὸ περιττῆσ πανουργίασ, ἐπ’ αὐτοφώρῳ δέ ποτε κατειλημμένοισ, εἶτ’ οὐδὲν ἐξευρίσκουσι σόφισμα κἄπειτ’ ἐνταῦθα τοῦ μὲν αἰδημονεστέρου σιωπῶντοσ, οἱο͂ν ἀποπληξίᾳ τινὶ κατειλημμένου, τοῦ δ’ ἀναισχυντοτέρου κρύπτοντοσ μὲν ἔθ’ ὑπὸ μάλησ τὸ ζητούμενον, ἐξομνυμένου δὲ καὶ μηδ’ ἑωρακέναι πώποτε φάσκοντοσ. οὕτω γάρ τοι καὶ ὁ Ἀσκληπιάδησ ἐπιλειπόντων αὐτὸν τῶν τῆσ πανουργίασ σοφισμάτων καὶ μήτε τῆσ πρὸσ τὸ λεπτομερὲσ φορᾶσ ἐχούσησ ἔτι χώραν ἐνταυθοῖ ληρεῖσθαι μήθ’ ὡσ ὑπὸ τῶν νεφρῶν γεννᾶται τουτὶ τὸ περίττωμα, καθάπερ ὑπὸ τῶν ἐν ἥπατι πόρων ἡ χολή, δυνατὸν ὂν εἰπόντα μὴ οὐ μέγιστον ὀφλεῖν γέλωτα, ἐξόμνυταί τε καὶ ψεύδεται φανερῶσ, οὐ διήκειν λέγων ἐπὶ τοὺσ νεφροὺσ τὸ οὖρον ἀλλ’ ἀτμοειδῶσ εὐθὺσ ἐκ τῶν κατὰ τὴν κοίλην μερῶν εἰσ τὴν κύστιν ἀθροίζεσθαι. οὗτοι μὲν οὖν τοῖσ ἐπ’ αὐτοφώρῳ κατειλημμένοισ οἰκέταισ ὁμοίωσ ἐκπλαγέντεσ ὁ μὲν ἐσιώπησεν, ὁ δ’ ἀναισχύντωσ ψεύδεται.

일치하는 문장이 없습니다.

SEARCH

MENU NAVIGATION