헬라어 문장 검색 - Γαλεν́ΟντηεΝά1́12́0́

(갈레노스, On the Natural Faculties., ΓΑΛΗΝΟΥ ΠΕΡΙ ΦΥΣΙΚΩΝ ΔΥΝΑΜΕΩΝ Α, section 12)

Ὁτι μὲν οὖν ἀναγκαῖον ὁμοίωσίν τιν· εἶναι τοῦ τρέφοντοσ τῷ τρεφομένῳ τὴν θρέψιν, ἄντικρυσ δῆλον. οὐ μὴν ὑπάρχουσάν γε ταύτην τὴν ὁμοίωσιν, ἀλλὰ φαινομένην μόνον εἶναί φασιν οἱ μήτε τεχνικὴν οἰόμενοι τὴν φύσιν εἶναι μήτε προνοητικὴν τοῦ ζῳού μήθ’ ὅλωσ τινὰσ οἰκείασ ἔχειν δυνάμεισ, αἷσ χρωμένη τὰ μὲν ἀλλοιοῖ, τὰ δ’ ἕλκει, τὰ δ’ ἐκκρίνει. καὶ αὗται δύο γεγόνασιν αἱρέσεισ κατὰ γένοσ ἐν ἰατρικῇ τε καὶ φιλοσοφίᾳ τῶν ἀποφηναμένων τι περὶ φύσεωσ ἀνδρῶν, ὅσοι γ’ αὐτῶν γιγνώσκουσιν, ὅ τι λέγουσι, καὶ τὴν ἀκολουθίαν ὧν ὑπέθεντο θεωροῦσι θ’ ἅμα καὶ διαφυλάττουσιν. ὅσοι δὲ μηδ’ αὐτὸ τοῦτο συνιᾶσιν, ἀλλ’ ἁπλῶσ, ὅ τι ἂν ἐπὶ γλῶτταν ἔλθῃ, ληροῦσιν, ἐν οὐδετέρᾳ τῶν αἱρέσεων ἀκριβῶσ καταμένοντεσ, οὐδὲ μεμνῆσθαι τῶν τοιούτων προσήκει. τίνεσ οὖν αἱ δύο αἱρέσεισ αὗται καὶ τίσ ἡ τῶν ἐν αὐταῖσ ὑποθέσεων ἀκολουθία; τὴν ὑποβεβλημένην οὐσίαν γενέσει καὶ φθορᾷ πᾶσαν ἡνωμένην θ’ ἅμα καὶ ἀλλοιοῦσθαι δυναμένην ὑπέθετο θάτερον γένοσ τῆσ αἱρέσεωσ, ἀμετάβλητον δὲ καὶ ἀναλλοίωτον καὶ κατατετμημένην εἰσ λεπτὰ καὶ κεναῖσ ταῖσ μεταξὺ χώραισ διειλημμένην ἡ λοιπή. καὶ τοίνυν ὅσοι γε τῆσ ἀκολουθίασ τῶν ὑποθέσεων αἰσθάνονται, κατὰ μὲν τὴν δευτέραν αἱρ́εσιν οὔτε φύσεωσ οὔτε ψυχῆσ ἰδίαν τινὰ νομίζουσιν οὐσίαν ἢ δύναμιν ὑπάρχειν, ἀλλ’ ἐν τῇ ποιᾷ συνόδῳ τῶν πρώτων ἐκείνων σωμάτων τῶν ἀπαθῶν ἀποτελεῖσθαι. κατὰ δὲ τὴν προτέραν εἰρημένην αἱρ́εσιν οὐχ ὑστέρα τῶν σωμάτων ἡ φύσισ, ἀλλὰ πολὺ προτέρα τε καὶ πρεσβυτέρα. καὶ τοίνυν κατὰ μὲν τούτουσ αὕτη τὰ σώματα τῶν τε φυτῶν καὶ τῶν ζῳών συνίστησι δυνάμεισ τινὰσ ἔχουσα τὰσ μὲν ἑλκτικάσ θ’ ἅμα καὶ ὁμοιωτικὰσ τῶν οἰκείων, τὰσ δ’ ἀποκριτικὰσ τῶν ἀλλοτρίων, καὶ τεχνικῶσ ἅπαντα διαπλάττει τε γεννῶσα καὶ προνοεῖται τῶν γεννωμένων ἑτέραισ αὖθίσ τισι δυνάμεσι, στερκτικῇ μέν τινι καὶ προνοητικῇ τῶν ἐγγόνων, κοινωνικῇ δὲ καὶ φιλικῇ τῶν ὁμογενῶν. κατὰ δ’ αὖ τοὺσ ἑτέρουσ οὔτε τούτων οὐδὲν ὑπάρχει ταῖσ φύσεσιν οὔτ’ ἔννοιά τίσ ἐστι τῇ ψυχῇ σύμφυτοσ ἐξ ἀρχῆσ οὐκ ἀκολουθίασ οὐ μάχησ, οὐ διαιρέσεωσ οὐ συνθέσεωσ, οὐ δικαίων οὐκ ἀδίκων, οὐ καλῶν οὐκ αἰσχρῶν, ἀλλ’ ἐξ αἰσθήσεώσ τε καὶ δι’ αἰσθήσεωσ ἅπαντα τὰ τοιαῦθ’ ἡμῖν ἐγγίγνεσθαί φασι καὶ φαντασίαισ τισὶ καὶ μνήμαισ οἰακίζεσθαι τὰ ζῷα. Ἔνιοι δ’ αὐτῶν καὶ Ῥητῶσ ἀπεφήναντο μηδεμίαν εἶναι τῆσ ψυχῆσ δύναμιν, ᾗ λογιζόμεθα, ἀλλ’ ὑπὸ τῶν αἰσθητῶν ἄγεσθαι παθῶν ἡμᾶσ καθάπερ βοσκήματα πρὸσ μηδὲν ἀνανεῦσαι μηδ’ ἀντειπεῖν δυναμένουσ. καθ’ οὓσ δηλονότι καὶ ἀνδρεία καὶ φρόνησισ καὶ σωφροσύνη καὶ ἐγκράτεια λῆρόσ ἐστι μακρὸσ καὶ φιλοῦμεν οὔτ’ ἀλλήλουσ οὔτε τὰ ἔγγονα καὶ τοῖσ θεοῖσ οὐδὲν ἡμῶν μέλει. καταφρονοῦσι δὲ καὶ τῶν ὀνειράτων καὶ τῶν οἰωνῶν καὶ τῶν συμβόλων καὶ πάσησ ἀστρολογίασ, ὑπὲρ ὧν ἡμεῖσ μὲν ἰδίᾳ δι’ ἑτέρων γραμμάτων ἐπὶ πλέον ἐσκεψάμεθα περὶ τῶν Ἀσκληπιάδου τοῦ ἰατροῦ σκοπούμενοι δογμάτων. ἔνεστι δὲ τοῖσ βουλομένοισ κἀκείνοισ μὲν ὁμιλῆσαι τοῖσ λόγοισ καὶ νῦν δ’ ἤδη σκοπεῖν, ὥσπερ τινῶν δυοῖν ὁδῶν ἡμῖν προκειμένων, ὁποτέραν βέλτιόν ἐστι τρέπεσθαι. Ἱπποκράτησ μὲν γὰρ τὴν προτέραν Ῥηθεῖσαν ἐτράπετο, καθ’ ἣν ἥνωται μὲν ἡ οὐσία καὶ ἀλλοιοῦται καὶ σύμπνουν ὅλον ἐστὶ καὶ σύρρουν τὸ σῶμα καὶ ἡ φύσισ ἅπαντα τεχνικῶσ καὶ δικαίωσ πράττει δυνάμεισ ἔχουσα, καθ’ ἃσ ἕκαστον τῶν μορίων ἕλκει μὲν ἐφ’ ἑαυτὸ τὸν οἰκεῖον ἑαυτῷ χυμόν, ἕλξαν δὲ προσφύει τε παντὶ μέρει τῶν ἐν αὑτῷ καὶ τελέωσ ἐξομοιοῖ, τὸ δὲ μὴ κρατηθὲν ἐν τούτῳ μηδὲ τὴν παντελῆ δυνηθὲν ἀλλοίωσίν τε καὶ ὁμοιότητα τοῦ τρεφομένου καταδέξασθαι δι’ ἑτέρασ αὖ τινοσ ἐκκριτικῆσ δυνάμεωσ ἀποτρίβεται.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Galen, On the Natural Faculties., ΓΑΛΗΝΟΥ ΠΕΡΙ ΦΥΣΙΚΩΝ ΔΥΝΑΜΕΩΝ Α, section 12

(갈레노스, On the Natural Faculties., ΓΑΛΗΝΟΥ ΠΕΡΙ ΦΥΣΙΚΩΝ ΔΥΝΑΜΕΩΝ Α, section 12)

상위

목록

SEARCH

MENU NAVIGATION