Euripides, Rhesus, episode 1:

οὐκ οἶδ’ ἀκριβῶσ· εἰκάσαι γε μὴν πάρα. νυκτὸσ γὰρ οὔτι φαῦλον ἐμβαλεῖν στρατόν, κλύοντα πλήρη πεδία πολεμίασ χερόσ. φόβον δ’ ἀγρώσταισ, οἳ κατ’ Ἰδαῖον λέπασ οἰκοῦμεν αὐτόρριζον ἑστίαν χθονόσ, παρέσχε δρυμὸν νυκτὸσ ἔνθηρον μολών. πολλῇ γὰρ ἠχῇ Θρῄκιοσ ῥέων στρατὸσ ἔστειχε· θάμβει δ’ ἐκπλαγέντεσ ἱέμεν ποίμνασ πρὸσ ἄκρασ, μή τισ Ἀργείων μόλῃ λεηλατήσων καὶ σὰ πορθήσων σταθμά, πρὶν δὴ δι’ ὤτων γῆρυν οὐχ Ἑλληνικὴν ἐδεξάμεσθα καὶ μετέστημεν φόβου. στείχων δ’ ἄνακτοσ προυξερευνητὰσ ὁδοῦ ἀνιστόρησα Θρῃκίοισ προσφθέγμασι, Τίσ ὁ στρατηγὸσ καὶ τίνοσ κεκλημένοσ στείχει πρὸσ ἄστυ Πριαμίδαισι σύμμαχοσ;