Euclid, Elements, book 4, type Def

Σχῆμα εὐθύγραμμον εἰσ σχῆμα εὐθύγραμμον ἐγγράφεσθαι λέγεται, ὅταν ἑκάστη τῶν τοῦ ἐγγραφομένου σχήματοσ γωνιῶν ἑκάστησ πλευρᾶσ τοῦ, εἰσ ὃ ἐγγράφεται, ἅπτηται. Σχῆμα δὲ ὁμοίωσ περὶ σχῆμα περιγράφεσθαι λέγεται, ὅταν ἑκάστη πλευρὰ τοῦ περιγραφομένου ἑκάστησ γωνίασ τοῦ, περὶ ὃ περιγράφεται, ἅπτηται. Σχῆμα εὐθύγραμμον εἰσ κύκλον ἐγγράφεσθαι λέγεται, ὅταν ἑκάστη γωνία τοῦ ἐγγραφομένου ἅπτηται τῆσ τοῦ κύκλου περιφερείασ. Σχῆμα δὲ εὐθύγραμμον περὶ κύκλον περιγράφεσθαι λέγεται, ὅταν ἑκάστη πλευρὰ τοῦ περιγραφομένου ἐφάπτηται τῆσ τοῦ κύκλου περιφερείασ. Κύκλοσ δὲ εἰσ σχῆμα ὁμοίωσ ἐγγράφεσθαι λέγεται, ὅταν ἡ τοῦ κύκλου περιφέρεια ἑκάστησ πλευρᾶσ τοῦ, εἰσ ὃ ἐγγράφεται, ἅπτηται. Κύκλοσ δὲ περὶ σχῆμα περιγράφεσθαι λέγεται, ὅταν ἡ τοῦ κύκλου περιφέρεια ἑκάστησ γωνίασ τοῦ, περὶ ὃ περιγράφεται, ἅπτηται. Εὐθεῖα εἰσ κύκλον ἐναρμόζεσθαι λέγεται, ὅταν τὰ πέρατα αὐτῆσ ἐπὶ τῆσ περιφερείασ ᾖ τοῦ κύκλου.