호흡부호 보기
강세부호 보기
장단부호 보기
작은 Iota 보기
모든 부호 보기
εἴ τισ ὑμῶν ὦ θεαταὶ τὴν ἐμὴν ἰδὼν φύσιν εἶτα θαυμάζει μ’ ὁρῶν μέσον διεσφηκωμένον, ἥτισ ἡμῶν ἐστὶν ἡ ’πίνοια τῆσ ἐγκεντρίδοσ, ῥᾳδίωσ ἐγὼ διδάξω, κἂν ἄμουσοσ ᾖ τὸ πρίν. ἐσμὲν ἡμεῖσ, οἷσ πρόσεστι τοῦτο τοὐρροπύγιον, Ἀττικοὶ μόνοι δικαίωσ ἐγγενεῖσ αὐτόχθονεσ, ἀνδρικώτατον γένοσ καὶ πλεῖστα τήνδε τὴν πόλιν ὠφελῆσαν ἐν μάχαισιν, ἡνίκ’ ἦλθ’ ὁ βάρβαροσ, τῷ καπνῷ τύφων ἅπασαν τὴν πόλιν καὶ πυρπολῶν, ἐξελεῖν ἡμῶν μενοινῶν πρὸσ βίαν τἀνθρήνια. εὐθέωσ γὰρ ἐκδραμόντεσ ξὺν δορὶ ξὺν ἀσπίδι ἐμαχόμεσθ’ αὐτοῖσι, θυμὸν ὀξίνην πεπωκότεσ, στὰσ ἀνὴρ παρ’ ἄνδρ’, ὑπ’ ὀργῆσ τὴν χελύνην ἐσθίων· ὑπὸ δὲ τῶν τοξευμάτων οὐκ ἦν ἰδεῖν τὸν οὐρανόν. ἀλλ’ ὅμωσ ἐωσάμεσθα ξὺν θεοῖσ πρὸσ ἑσπέραν. γλαῦξ γὰρ ἡμῶν πρὶν μάχεσθαι τὸν στρατὸν διέπτετο· εἶτα δ’ εἱπόμεσθα θυννάζοντεσ ἐσ τοὺσ θυλάκουσ, οἱ δ’ ἔφευγον τὰσ γνάθουσ καὶ τὰσ ὀφρῦσ κεντούμενοι· ὥστε παρὰ τοῖσ βαρβάροισι πανταχοῦ καὶ νῦν ἔτι μηδὲν Ἀττικοῦ καλεῖσθαι σφηκὸσ ἀνδρικώτερον.
이 저작물은 크리에이티브 커먼즈 저작자표시-비영리 4.0 국제 라이선스에 따라 이용할 수 있습니다.
bab2min@gmail.com
호흡부호 보기
강세부호 보기
장단부호 보기
작은 Iota 보기
모든 부호 보기