Aeschylus, Prometheus Bound, episode

(아이스킬로스, 결박된 프로메테우스, episode)

πάντ’ ἐκκάλυψον καὶ γέγων’ ἡμῖν λόγον, ποίῳ λαβών σε Ζεὺσ ἐπ’ αἰτιάματι, οὕτωσ ἀτίμωσ καὶ πικρῶσ αἰκίζεται· δίδαξον ἡμᾶσ, εἴ τι μὴ βλάπτει λόγῳ. ἀλγεινὰ μέν μοι καὶ λέγειν ἐστὶν τάδε, ἄλγοσ δὲ σιγᾶν, πανταχῇ δὲ δύσποτμα. ἐπεὶ τάχιστ’ ἤρξαντο δαίμονεσ χόλου στάσισ τ’ ἐν ἀλλήλοισιν ὠροθύνετο, οἱ μὲν θέλοντεσ ἐκβαλεῖν ἕδρασ Κρόνον, ὡσ Ζεὺσ ἀνάσσοι δῆθεν, οἱ δὲ τοὔμπαλιν σπεύδοντεσ, ὡσ Ζεὺσ μήποτ’ ἄρξειεν θεῶν, ἐνταῦθ’ ἐγὼ τὰ λῷστα βουλεύων πιθεῖν Τιτᾶνασ, Οὐρανοῦ τε καὶ Χθονὸσ τέκνα, οὐκ ἠδυνήθην. αἱμύλασ δὲ μηχανὰσ ἀτιμάσαντεσ καρτεροῖσ φρονήμασιν ᾤοντ’ ἀμοχθεὶ πρὸσ βίαν τε δεσπόσειν· ἐμοὶ δὲ μήτηρ οὐχ ἅπαξ μόνον Θέμισ, καὶ Γαῖα, πολλῶν ὀνομάτων μορφὴ μία, τὸ μέλλον κραίνοιτο προυτεθεσπίκει, ὡσ οὐ κατ’ ἰσχὺν οὐδὲ πρὸσ τὸ καρτερόν χρείη, δόλῳ δὲ τοὺσ ὑπερσχόντασ κρατεῖν. τοιαῦτ’ ἐμοῦ λόγοισιν ἐξηγουμένου οὐκ ἠξίωσαν οὐδὲ προσβλέψαι τὸ πᾶν. κράτιστα δή μοι τῶν παρεστώτων τότε ἐφαίνετ’ εἶναι προσλαβόντα μητέρα ἑκόνθ’ ἑκόντι Ζηνὶ συμπαραστατεῖν. ἐμαῖσ δὲ βουλαῖσ Ταρτάρου μελαμβαθὴσ κευθμὼν καλύπτει τὸν παλαιγενῆ Κρόνον αὐτοῖσι συμμάχοισι. τοιάδ’ ἐξ ἐμοῦ ὁ τῶν θεῶν τύραννοσ ὠφελημένοσ κακαῖσι ποιναῖσ ταῖσδὲ μ’ ἐξημείψατο. ἔνεστι γάρ πωσ τοῦτο τῇ τυραννίδι νόσημα, τοῖσ φίλοισι μὴ πεποιθέναι.

상위

Prometheus Bound (결박된 프로메테우스)

목록

일치하는 문장이 없습니다.

SEARCH

MENU NAVIGATION