Sophocles, Ajax, episode

(소포클레스, Ajax, episode)

ἅπανθ’ ὁ μακρὸσ κἀναρίθμητοσ χρόνοσ φύει τ’ ἄδηλα καὶ φανέντα κρύπτεται· κοὐκ ἔστ’ ἀέλπτον οὐδέν, ἀλλ’ ἁλίσκεται χὠ δεινὸσ ὁρ́κοσ χαἰ περισκελεῖσ φρένεσ. κἀγὼ γάρ, ὃσ τὰ δείν’ ἐκαρτέρουν τότε, βαφῇ σίδηροσ ὣσ ἐθηλύνθην στόμα πρὸσ τῆσδε τῆσ γυναικόσ· οἰκτίρω δέ νιν χήραν παρ’ ἐχθροῖσ παῖδά τ’ ὀρφανὸν λιπεῖν. ἀλλ’ εἶμι πρόσ τε λουτρὰ καὶ παρακτίουσ λειμῶνασ, ὡσ ἂν λύμαθ’ ἁγνίσασ ἐμὰ μῆνιν βαρεῖαν ἐξαλύξωμαι θεᾶσ· μολών τε χῶρον ἔνθ’ ἂν ἀστιβῆ κίχω, κρύψω τόδ’ ἔγχοσ τοὐμόν, ἔχθιστον βελῶν, γαίασ ὀρύξασ ἔνθα μή τισ ὄψεται· ἀλλ’ αὐτὸ νὺξ Αἵδησ τε σῳζόντων κάτω. ἐγὼ γὰρ ἐξ οὗ χειρὶ τοῦτ’ ἐδεξάμην παρ’ Ἕκτοροσ δώρημα δυσμενεστάτου, οὔπω τι κεδνὸν ἔσχον Ἀργείων πάρα. ἀλλ’ ἔστ’ ἀληθὴσ ἡ βροτῶν παροιμία, ἐχθρῶν ἄδωρα δῶρα κοὐκ ὀνήσιμα. τοιγὰρ τὸ λοιπὸν εἰσόμεσθα μὲν θεοῖσ εἴκειν, μαθησόμεσθα δ’ Ἀτρείδασ σέβειν. ἄρχοντέσ εἰσιν, ὥσθ’ ὑπεικτέον. τί μήν; καὶ γὰρ τὰ δεινὰ καὶ τὰ καρτερώτατα ἕτοιμ’ ὑπείκει· τοῦτο μὲν νιφοστιβεῖσ χειμῶνεσ ἐκχωροῦσιν εὐκάρπῳ θέρει· ἐξίσταται δὲ νυκτὸσ αἰανὴσ κύκλοσ τῇ λευκοπώλῳ φέγγοσ ἡμέρᾳ φλέγειν· δεινῶν τ’ ἀήμα πνευμάτων ἐκοίμισε στένοντα πόντον· ἐν δ’ ὁ παγκρατὴσ ὕπνοσ λύει πεδήσασ, οὐδ’ ἀεὶ λαβὼν ἔχει. ἡμεῖσ δὲ πῶσ οὐ γνωσόμεσθα σωφρονεῖν; ἔγωγ’· ἐπίσταμαι γὰρ ἀρτίωσ ὅτι ὅ τ’ ἐχθρὸσ ἡμῖν ἐσ τοσόνδ’ ἐχθαρτέοσ, ὡσ καὶ φιλήσων αὖθισ, ἔσ τε τὸν φίλον τοσαῦθ’ ὑπουργῶν ὠφελεῖν βουλήσομαι, ὡσ αἰὲν οὐ μενοῦντα· τοῖσ πολλοῖσι γὰρ βροτῶν ἄπιστόσ ἐσθ’ ἑταιρείασ λιμήν. ἀλλ’ ἀμφὶ μὲν τούτοισιν εὖ σχήσει· σὺ δὲ ἔσω θεοῖσ ἐλθοῦσα διὰ τάχουσ, γύναι, εὔχου τελεῖσθαι τοὐμὸν ὧν ἐρᾷ κέαρ. ὑμεῖσ δ’, ἑταῖροι, ταὐτὰ τῇδέ μοι τάδε τιμᾶτε, Τεύκρῳ τ’, ἢν μόλῃ, σημήνατε μέλειν μὲν ἡμῶν, εὐνοεῖν δ’ ὑμῖν ἅμα. ἐγὼ γὰρ εἶμ’ ἐκεῖσ’ ὅποι πορευτέον· ὑμεῖσ δ’ ἃ φράζω δρᾶτε, καὶ τάχ’ ἄν μ’ ἴσωσ πύθοισθε, κεἰ νῦν δυστυχῶ, σεσωσμένον.

일치하는 문장이 없습니다.

SEARCH

MENU NAVIGATION