Plutarch, Lycurgus, chapter 1

(플루타르코스, Lycurgus, chapter 1)

περὶ Λυκούργου τοῦ νομοθέτου καθόλου μὲν οὐδὲν ἔστιν εἰπεῖν ἀναμφισβήτητον, οὗ γε καὶ γένοσ καὶ ἀποδημία καὶ τελευτὴ καὶ πρὸσ ἅπασιν ἡ περὶ τοὺσ νόμουσ αὐτοῦ καὶ τὴν πολιτείαν πραγματεία διαφόρουσ ἔσχηκεν ἱστορίασ, ἥκιστα δὲ οἱ χρόνοι καθ’ οὓσ γέγονεν ὁ ἀνὴρ ὁμολογοῦνται, οἱ μὲν γάρ Ἰφίτῳ συνακμάσαι καὶ συνδιαθεῖναι τὴν Ὀλυμπιακὴν ἐκεχειρίαν λέγουσιν αὐτόν, ὧν ἐστι καὶ Ἀριστοτέλησ ὁ φιλόσοφοσ, τεκμήριον προσφέρων τὸν Ὀλυμπίασι δίσκον ἐν ᾧ τοὔνομα τοῦ Λυκούργου διασώζεται καταγεγραμμένον· οἱ δὲ ταῖσ διαδοχαῖσ τῶν ἐν Σπάρτῃ βεβασιλευκότων ἀναλεγόμενοι τὸν χρόνον, ὥσπερ Ἐρατοσθένησ καὶ Ἀπολλόδωροσ, οὐκ ὀλίγοισ ἔτεσι πρεσβύτερον ἀποφαίνουσι τῆσ πρώτησ Ὀλυμπιάδοσ.

Τίμαιοσ δὲ ὑπονοεῖ, δυεῖν ἐν Σπάρτῃ γεγονότων Λυκούργων οὐ κατὰ τὸν αὐτὸν χρόνον, τῷ ἑτέρῳ τὰσ ἀμφοῖν πράξεισ διὰ τὴν δόξαν ἀνακεῖσθαι καὶ τόν γε πρεσβύτερον οὐ πόρρω τῶν Ὁμήρου γεγονέναι χρόνων, ἔνιοι δὲ καὶ κατ’ ὄψιν ἐντυχεῖν Ὁμήρῳ. δίδωσι δὲ καὶ Ξενοφῶν ὑπόνοιαν ἀρχαιότητοσ ἐν οἷσ τὸν ἄνδρα λέγει γεγονέναι κατὰ τοὺσ Ἡρακλείδασ.

γένει μὲν γὰρ Ἡρακλεῖδαι δήπουθεν ἦσαν καὶ οἱ νεώτατοι τῶν ἐν Σπάρτῃ βασιλέων, ὁ δὲ ἐοίκε βουλομένῳ τοὺσ πρώτουσ ἐκείνουσ καὶ σύνεγγυσ Ἡρακλέουσ ὀνομάζειν Ἡρακλείδασ. οὐ μὴν ἀλλὰ καίπερ οὕτωσ πεπλανημένησ τῆσ ἱστορίασ, πειρασόμεθα τοῖσ βραχυτάτασ ἔχουσιν ἀντιλογίασ ἢ γνωριμωτάτουσ μάρτυρασ ἑπόμενοι τῶν γεγραμμένων περὶ τοῦ ἀνδρὸσ ἀποδοῦναι τὴν διήγησιν. ἐπεὶ καὶ Σιμωνίδησ ὁ ποιητὴσ οὐκ Εὐνόμου λέγει τὸν Λυκοῦργον πατρόσ, ἀλλὰ Πρυτάνιδοσ καὶ τὸν Λυκοῦργον καὶ τὸν Εὔνομον, οἱ δὲ πλεῖστοι σχεδὸν οὐχ οὕτω γενεαλογοῦσιν, ἀλλὰ Προκλέουσ μὲν τοῦ Ἀριστοδήμου γενέσθαι Σόον, Σόου δὲ Εὐρυπῶντα, τούτου δὲ Πρύτανιν, ἐκ τούτου δὲ Εὔνομον, Εὐνόμου δὲ Πολυδέκτην ἐκ προτέρασ γυναικόσ, Λυκοῦργον δὲ νεώτερον ἐκ Διωνάσσησ, ὡσ Διευτυχίδασ ἱστόρηκεν, ἕκτον μὲν ἀπὸ Προκλέουσ, ἑνδέκατον δὲ ἀφ’ Ἡρακλέουσ.

SEARCH

MENU NAVIGATION