Epictetus, Works, chapter 49

(에픽테토스, Works, chapter 49)

Ὅταν τισ ἐπὶ τῷ νοεῖν καὶ ἐξηγεῖσθαι δύνασθαι τὰ Χρυσίππου βιβλία σεμνύνηται, λέγε αὐτὸσ πρὸσ ἑαυτὸν ὅτι "εἰ μὴ Χρύσιπποσ ἀσαφῶσ ἐγεγράφει, οὐδὲν ἂν εἶχεν οὗτοσ, ἐφ’ ᾧ ἐσεμνύνετο. " ἐγὼ δὲ τί βούλομαι; καταμαθεῖν τὴν φύσιν καὶ ταύτῃ ἕπεσθαι. ζητῶ οὖν, τίσ ἐστιν ὁ ἐξηγούμενοσ· καὶ ἀκούσασ, ὅτι Χρύσιπποσ, ἔρχομαι πρὸσ αὐτόν. ἀλλ’ οὐ νοῶ τὰ γεγραμμένα· ζητῶ οὖν τὸν ἐξηγούμενον. καὶ μέχρι τούτων οὔπω σεμνὸν οὐδέν. ὅταν δὲ εὑρ́ω τὸν ἐξηγούμενον, ἀπολείπεται χρῆσθαι τοῖσ παρηγγελμένοισ· τοῦτο αὐτὸ μόνον σεμνόν ἐστιν. ἂν δὲ αὐτὸ τοῦτο τὸ ἐξηγεῖσθαι θαυμάσω, τί ἄλλο ἢ γραμματικὸσ ἀπετελέσθην ἀντὶ φιλοσόφου; πλήν γε δὴ ὅτι ἀντὶ Ὁμήρου Χρύσιππον ἐξηγούμενοσ. μᾶλλον οὖν, ὅταν τισ εἴπῃ μοι "ἐπανάγνωθί μοι Χρύσιππον", ἐρυθριῶ, ὅταν μὴ δύνωμαι ὅμοια τὰ ἔργα καὶ σύμφωνα ἐπιδεικνύειν τοῖσ λόγοισ.

SEARCH

MENU NAVIGATION