호흡부호 보기
강세부호 보기
장단부호 보기
작은 Iota 보기
모든 부호 보기
τὰ δ’ αὐτὰ καὶ περὶ τῆσ περιέργου λέξεωσ ἔχοι τισ ἂν εἰπεῖν πρὸσ τὸν Αἰσχίνην, ἐπειδὴ καὶ ταύτην αὐτοῦ χλευάζει τὴν ἀρετήν. δεχέσθω δέ τισ τὴν περιεργίαν τῶν ὀνομάτων ὑπ’ αὐτοῦ λεγομένην λέγεσθαι νυνὶ περιττὴν ἐργασίαν καὶ ἐξηλλαγμένην τῶν ἐν ἔθει. οὐ γὰρ δή γε εἰ ὁ καθ’ ἡμᾶσ βίοσ πολλὰ καὶ ἄλλα εἰκῇ τιθεὶσ ἐπὶ τοῖσ πράγμασιν ὀνόματα καὶ ταύτην ἀδιαφόρωσ κυκλεῖ τὴν λέξιν ἐπὶ τῆσ πολυπραγμοσύνησ, οὕτω καὶ τοὺσ ἀρχαίουσ εἰκὸσ αὐτῇ κεχρῆσθαι. εἰ μὲν οὖν τὴν ἀκαιρίαν ἢ τὸν πλεονασμὸν τῆσ ἐξηλλαγμένησ ἑρμηνείασ διασύρων καὶ ταῦτα εἴρηκεν, ὡσ τοῦ Δημοσθένουσ περὶ ἑκάτερον αὐτῶν ἁμαρτάνοντοσ, ψεύδεται περιφανῶσ. ὁ γὰρ ἀνὴρ ἐν μὲν ταῖσ δημηγορίαισ καὶ τοῖσ δημοσίοισ ἀγῶσι πρὸσ τὸ μέγεθοσ καὶ τὸ ἀξίωμα τῶν ὑποθέσεων ἀποβλέπων κέχρηται τῇ τοιαύτῃ κατασκευῇ πολλάκισ, ἐν δὲ τοῖσ ἰδιωτικοῖσ λόγοισ, οὓσ περὶ μικρῶν συμβολαίων ἰδιώταισ ἀνθρώποισ γέγραφε, τὴν κοινὴν καὶ συνήθη λέξιν ἐπιτηδεύει, σπανίωσ δέ ποτε τὴν περιττὴν καὶ οὐδὲ ταύτην ἐπ’ αὐτοφώρῳ, ἀλλ’ ὥστε λαθεῖν. εἰ δὲ κἀνταῦθα τῷ γένει τῆσ ἐξαλλαγῆσ ὅλῳ πολεμῶν ταῦτ’ εἴρηκεν Αἰσχίνησ, ἄτοπόν τι ποιεῖ πρᾶγμα, ταύτην διασύρων τὴν δεινότητα, ἧσ πλείστησ τῷ ῥήτορι δεῖ. τὸ γὰρ μὴ τοῖσ πολλοῖσ ὁμοίωσ ἐκφέρειν τὰσ νοήσεισ, ἀλλ’ ἐπὶ τὸ σεμνότερον καὶ ποιητικώτερον ἐκβιβάζειν τὴν ὀνομασίαν παρὰ τῆσ πολιτικῆσ δυνάμεωσ μάλιστα ἀπαιτοῦμεν. ταῦτα μὲν οὖν ἐγκώμια τῆσ Δημοσθένουσ δεινότητοσ ὄντα ὡσ ἁμαρτήματα φέρων Αἰσχίνησ οὐκ ἀληθῶσ μέν, εὐλόγωσ δ’ ἴσωσ, ἐχθρὸσ ὢν καὶ οὐδὲν ἄλλο διαβάλλειν δυνάμενοσ, ἀπερισκέπτωσ, ὡσ ἐγὼ κρίνω, συκοφαντεῖ.
이 저작물은 크리에이티브 커먼즈 저작자표시-비영리 4.0 국제 라이선스에 따라 이용할 수 있습니다.
bab2min@gmail.com
호흡부호 보기
강세부호 보기
장단부호 보기
작은 Iota 보기
모든 부호 보기