Dionysius of Halicarnassus, Antiquitates Romanae, Books X-XX, book 11, chapter 45

(디오니시오스, Antiquitates Romanae, Books X-XX, book 11, chapter 45)

οἱ δὲ μετὰ τὴν κατάλυσιν τῆσ δεκαδαρχίασ τὴν ὕπατον ἀρχὴν πρῶτοι παρὰ τοῦ δήμου λαβόντεσ ἐπὶ τῆσ λοχίτιδοσ ἐκκλησίασ, ὥσπερ ἔφην, Λεύκιοσ Οὐαλέριοσ Ποτῖτοσ καὶ Μάρκοσ Ὁράτιοσ Βαρβᾶτοσ, αὐτοί τε δημοτικοὶ τὰσ φύσεισ ὄντεσ καὶ παρὰ τῶν προγόνων ταύτην διαδεδεγμένοι τὴν πολιτείαν, τὰσ ὑποσχέσεισ φυλάττοντεσ, ἃσ ἐποιήσαντο πρὸσ τοὺσ δημοτικούσ, ὅτ’ ἀποθέσθαι τὰ ὅπλα συνέπειθον αὐτούσ, ὡσ πάντα τὰ συμφέροντα τῷ δήμῳ πολιτευσόμενοι, νόμουσ ἐκύρωσαν ἐν ἐκκλησίαισ λοχίτισι, δυσχεραινόντων μὲν τῶν πατρικίων, αἰδουμένων δ’ ἀντιλέγειν, ἄλλουσ τέ τινασ, οὓσ οὐ δέομαι γράφειν, καὶ τὸν κελεύοντα τοὺσ ὑπὸ τοῦ δήμου τεθέντασ ἐν ταῖσ φυλετικαῖσ ἐκκλησίαισ νόμουσ ἅπασι κεῖσθαι Ῥωμαίοισ ἐξ ἴσου, τὴν αὐτὴν ἔχοντασ δύναμιν τοῖσ ἐν ταῖσ λοχίτισιν ἐκκλησίαισ τεθησομένοισ. τιμωρίαι δὲ προσέκειντο τοῖσ καταλύουσιν ἢ παραβαίνουσι τὸν νόμον, ἐὰν ἁλῶσι, θάνατοσ καὶ δήμευσισ τῆσ οὐσίασ. οὗτοσ ὁ νόμοσ ἐξέβαλε τὰσ ἀμφισβητήσεισ τῶν πατρικίων, ἃσ ἐποιοῦντο πρὸσ τοὺσ δημοτικοὺσ πρότερον, οὐκ ἀξιοῦντεσ τοῖσ ὑπ’ ἐκείνων τεθεῖσι νόμοισ πειθαρχεῖν, οὐδ’ ὅλωσ τὰ ἐν ταῖσ φυλετικαῖσ ἐκκλησίαισ ἐπικυρούμενα κοινὰ τῆσ πόλεωσ ἁπάσησ δόγματα νομίζοντεσ, ἀλλ’ αὐτὸ μόνοισ ἐκείνοισ ἴδιον·

ὅ τι δ’ ἂν ἡ λοχῖτισ ἐκκλησία γνῷ, τοῦθ’ ἡγούμενοι σφίσι τ’ αὐτοῖσ καὶ τοῖσ ἄλλοισ πολίταισ τετάχθαι. εἴρηται δὲ καὶ πρότερον, ὅτι ἐν μὲν ταῖσ φυλετικαῖσ ἐκκλησίαισ οἱ δημοτικοὶ καὶ πένητεσ ἐκράτουν τῶν πατρικίων, ἐν δὲ ταῖσ λοχίτισιν ἐκκλησίαισ οἱ πατρίκιοι παρὰ πολὺ τῶν ἄλλων ἐλάττουσ ὄντεσ περιῆσαν τῶν δημοτικῶν.

SEARCH

MENU NAVIGATION