Dionysius of Halicarnassus, Antiquitates Romanae, Books X-XX, book 11, chapter 19

(디오니시오스, Antiquitates Romanae, Books X-XX, book 11, chapter 19)

ὡσ δ’ αἱ πλείουσ γνῶμαι διηγορεύθησαν, καὶ παρὰ πολὺ κρατεῖν ἐδόκουν οἱ τὸν πόλεμον ἐπικυροῦντεσ τῶν ἑτέρων, τότε Λεύκιον Οὐαλέριον ἐν τοῖσ ἐσχάτοισ ἐκάλουν, ὃν ἔφην εὐθὺσ ἐν ἀρχαῖσ βουλόμενόν τι λέγειν κεκωλῦσθαι πρὸσ αὐτῶν. ὁ δὲ ἀναστὰσ τοιούτουσ διεξῆλθε λόγουσ· τὴν μὲν ἐπιβουλὴν τῶν δέκα ὁρᾶτε, ὦ πατέρεσ, οἳ κατ’ ἀρχάσ τ’ οὐκ ἐπέτρεψάν μοι λέγειν ὅσα προῃρούμην πρὸσ ὑμᾶσ, καὶ νῦν ἐν τοῖσ ὑστάτοισ ἀποδεδώκασι λόγον ἐνθυμηθέντεσ, ὅπερ εἰκόσ, ὅτι τῇ τε Κλαυδίου γνώμῃ προσθέμενοσ οὐδὲν ὠφελήσω τὸ κοινὸν ὀλίγων αὐτῇ συνειρηκότων·

ἑτέραν τε γνώμην παρὰ τὰσ εἰρημένασ αὐτοῖσ ἀποφηνάμενοσ, κἂν τὰ κράτιστα ὑποθῶμαι, διακενῆσ ἐρραψῳδηκὼσ ἔσομαι.

εὐαρίθμητοι γάρ τινέσ εἰσιν οἱ μετ’ ἐμὲ ἀναστησόμενοι, οὓσ ἐὰν ἅπαντασ ὁμογνώμονασ λάβω, τί γενήσεταί μοι πλέον οὐδὲ πολλοστὴν ἕξοντι μοῖραν τῶν Κορνηλίῳ συναγορευόντων;

οὐ μὴν ἐγὼ ταῦθ’ ὑφορώμενοσ ὀκνήσω τὴν ἐμαυτοῦ γνώμην εἰπεῖν. ὅταν γὰρ ἀκούσητε πάντων, ἐφ’ ὑμῖν ἔσται τὰ κράτιστα ἑλέσθαι. περὶ μὲν οὖν τῆσ δεκαδαρχίασ, ὃν τρόπον ἐπιμελεῖται τῶν κοινῶν, ὅσα Κλαύδιοσ ὁ βέλτιστοσ εἶπε, καὶ ἐμοὶ νομίσατε εἰρῆσθαι, καὶ ὅτι δεῖ νέασ ἀρχὰσ ἀποδειχθῆναι, πρὶν ἢ τὸ περὶ τοῦ πολέμου γενέσθαι ψήφισμα·

καὶ γὰρ ταῦτα εἴρηται τῷ ἀνδρὶ κατὰ τὸ βέλτιστον. ἐπεὶ δὲ Κορνήλιοσ εἰσ τὸ ἀδύνατον ἀπάγειν ἐπειρᾶτο τὴν γνώμην πολλοὺσ τοὺσ μεταξὺ χρόνουσ ἀποφαίνων ταῖσ πολιτικαῖσ οἰκονομίαισ γενησομένουσ ἐν χερσὶν ὄντοσ τοῦ πολέμου, καὶ χλευάζειν ἐπεχείρει πράγματα οὐκ ἐπιτήδεια χλευασμῶν, οἷσ παρακρουσάμενοσ ὑμᾶσ τοὺσ πολλοὺσ ᾤχετο φέρων, ἐγὼ καὶ περὶ τοῦ μὴ ἀδύνατον εἶναι τὴν Κλαυδίου γνώμην διαλέξομαι πρὸσ ὑμᾶσ·

ὡσ μὲν γὰρ ἀσύμφοροσ, οὐδὲ τῶν διασυράντων αὐτὴν οὐδεὶσ ἐτόλμησεν εἰπεῖν· καὶ διδάξω, πῶσ ἂν ἥ τε χώρα δι’ ἀσφαλείασ γένοιτο, καὶ δίκην δοῖεν οἱ τολμήσαντεσ αὐτὴν κακῶσ ποιεῖν, καὶ τὴν πάτριον ἀπολάβοιμεν ἀριστοκρατίαν, καὶ ταῦθ’ ἅμα γένοιτο συναγωνιζομένων ἁπάντων τῶν ἐν τῇ πόλει καὶ μηδενὸσ τἀναντία πράττειν ἀξιοῦντοσ, σοφίαν οὐδεμίαν ἀποδεικνύμενοσ ὑμῖν, τὰ δὲ πραχθέντα ὑφ’ ὑμῶν αὐτῶν παραδείγματα φέρων. ἔνθα γὰρ ἡ πεῖρα διδάσκει τὸ συμφέρον, τί δεῖ στοχασμῶν ἐκεῖ;

SEARCH

MENU NAVIGATION