Diodorus Siculus, Library, book xvii, chapter 22

(디오도로스 시켈로스, Library, book xvii, chapter 22)

οἱ δὲ πολιορκούμενοι τὸ μὲν πρῶτον ῥᾳδίωσ ἀπὸ τῶν τειχῶν ἠμύνοντο, πολλῶν μὲν στρατιωτῶν ἠθροισμένων εἰσ τὴν πόλιν, βελῶν δὲ καὶ τῶν ἄλλων τῶν εἰσ τὴν πολιορκίαν χρησίμων δαψιλῆ χορηγίαν ἔχοντεσ· ἐπεὶ δὲ ὁ βασιλεὺσ φιλοτιμότερον ταῖσ τε μηχαναῖσ ἐσάλευε τὰ τείχη καὶ τὴν πολιορκίαν ἐνεργεστάτην ἐποιεῖτο κατὰ γῆν ἅμα καὶ κατὰ θάλατταν οἵ τε Μακεδόνεσ διὰ τῶν πιπτόντων τειχῶν εἰσεβιάζοντο, τηνικαῦτα κατισχυόμενοι πρὸσ φυγὴν ἐτράποντο.

εὐθὺ δ’ οἱ Μιλήσιοι μεθ’ ἱκετηριῶν τῷ βασιλεῖ προσπίπτοντεσ παρέδωκαν σφᾶσ αὐτοὺσ καὶ τὴν πόλιν.

τῶν δὲ βαρβάρων οἱ μὲν ὑπὸ τῶν Μακεδόνων ἀνῃρέθησαν, οἱ δὲ τῆσ πόλεωσ ἐκπίπτοντεσ ἔφευγον, οἱ δ’ ἄλλοι πάντεσ ἥλωσαν. ὁ δ’ Ἀλέξανδροσ τοῖσ μὲν Μιλησίοισ φιλανθρώπωσ προσηνέχθη, τοὺσ δ’ ἄλλουσ ἅπαντασ ἐξηνδραποδίσατο.

τῆσ δὲ ναυτικῆσ δυνάμεωσ οὔσησ ἀχρήστου καὶ δαπάνασ μεγάλασ ἐχούσησ κατέλυσε τὸ ναυτικὸν πλὴν ὀλίγων νεῶν, αἷσ ἐχρῆτο πρὸσ τὴν παρακομιδὴν τῶν πολιορκητικῶν ὀργάνων, ἐν αἷσ ἦσαν αἱ παρ’ Ἀθηναίων νῆεσ συμμαχίδεσ εἴκοσιν.

일치하는 문장이 없습니다.

SEARCH

MENU NAVIGATION