Appian, The Foreign Wars, chapter 2 1:

(아피아노스, The Foreign Wars, chapter 2 1:)

Ἄγρων ἦν βασιλεὺσ Ἰλλυριῶν μέρουσ ἀμφὶ τὸν κόλπον τῆσ θαλάσσησ τὸν Ιὄνιον, ὃν δὴ καὶ Πύρροσ ὁ τῆσ Ἠπείρου βασιλεὺσ κατεῖχε καὶ οἱ τὰ Πύρρου διαδεξάμενοι. Ἄγρων δ’ ἔμπαλιν τῆσ τε Ἠπείρου τινὰ καὶ Κόρκυραν ἐπ’ αὐτοῖσ καὶ Ἐπίδαμνον καὶ Φάρον καταλαβὼν ἔμφρουρα εἶχεν. ἐπιπλέοντοσ δ’ αὐτοῦ καὶ τὸν ἄλλον Ιὄνιον, νῆσοσ, ᾗ ὄνομα Ἴσσα, ἐπὶ Ῥωμαίουσ κατέφυγεν. οἱ δὲ πρέσβεισ τοῖσ Ἰσσίοισ συνέπεμψαν, εἰσομένουσ τὰ Ἄγρωνοσ ἐσ αὐτοὺσ ἐγκλήματα. τοῖσ δὲ πρέσβεσιν ἔτι προσπλέουσιν ἐπαναχθέντεσ Ἰλλυρικοὶ λέμβοι τῶν μὲν Ἰσσίων πρεσβευτὴν Κλεέμπορον, τῶν δὲ Ῥωμαίων Κορογκάνιον ἀναιροῦσιν· οἱ δὲ λοιποὶ διέδρασαν αὐτούσ. καὶ ἐπὶ τῷδε Ῥωμαίων ἐπ’ Ἰλλυριοὺσ ναυσὶν ὁμοῦ καὶ πεζῷ στρατευόντων, Ἄγρων μὲν ἐπὶ παιδίῳ σμικρῷ, Πίννῃ ὄνομα, ἀποθνήσκει, τῇ γυναικὶ τὴν ἀρχὴν ἐπιτροπεύειν τῷ παιδὶ παραδούσ, καίπερ οὐκ οὔσῃ μητρὶ τοῦ παιδίου, Δημήτριοσ δ’ ὁ Φάρου ἡγούμενοσ Ἄγρωνι Φ̔άρου τε γὰρ αὐτῆσ ἦρχε, καὶ ἐπὶ τῇδε Κορκύρασ̓ παρέδωκεν ἄμφω Ῥωμαίοισ ἐπιπλέουσιν ἐκ προδοσίασ. οἱ δ’ ἐπὶ ταύταισ Ἐπίδαμνον ἐσ φιλίαν ὑπηγάγοντο, καὶ τοῖσ Ἰσσίοισ καὶ Ἐπιδαμνίοισ πολιορκουμένοισ ὑπὸ Ἰλλυριῶν ἐσ ἐπικουρίαν ἔπλεον. Ἰλλυριοὶ μὲν δὴ τὰσ πολιορκίασ λύσαντεσ ἀνεχώρουν, καί τινεσ αὐτῶν ἐσ Ῥωμαίουσ, οἱ Ἀτιντανοὶ λεγόμενοι, μετετίθεντο. μετὰ ταῦτα δὲ ἡ Ἄγρωνοσ γυνὴ πρέσβεισ ἐσ Ῥώμην ἔπεμψε τά τε αἰχμάλωτα ἀποδιδόντασ αὐτοῖσ καὶ τοὺσ αὐτομόλουσ ἄγοντασ, καὶ ἐδεῖτο συγγνώμησ τυχεῖν τῶν οὐκ ἐφ’ ἑαυτῆσ ἀλλ’ ἐπὶ Ἄγρωνοσ γενομένων. οἱ δὲ ἀπεκρίναντο Κόρκυραν μὲν καὶ Φάρον καὶ Ἴσσαν καὶ Ἐπίδαμνον καὶ Ἰλλυριῶν τοὺσ Ἀτιντανοὺσ ἤδη Ῥωμαίων ὑπηκόουσ εἶναι, Πίννην δὲ τὴν ἄλλην Ἄγρωνοσ ἀρχὴν ἔχειν καὶ φίλον εἶναι Ῥωμαίοισ, ἢν ἀπέχηταί τε τῶν προλελεγμένων, καὶ τὴν Λίσσον μὴ παραπλέωσιν Ἰλλυρικοὶ λέμβοι δυοῖν πλείονεσ, καὶ τούτοιν δὲ ἀνόπλοιν.

SEARCH

MENU NAVIGATION