Dionysius of Halicarnassus, Antiquitates Romanae, book 3, chapter 49

(디오니시오스, Antiquitates Romanae, book 3, chapter 49)

τοιοῦτοσ μὲν δή τισ ὁ Ταρκύνιοσ ἦν καὶ διὰ ταύτασ τὰσ αἰτίασ ζῶντόσ τε Μαρκίου πάντων ἐγένετο Ῥωμαίων ἐπιφανέστατοσ καὶ τελευτήσαντοσ ἐκείνου τῆσ βασιλείασ ὑπὸ πάντων ἄξιοσ ἐκρίθη. ἐπειδὴ δὲ παρέλαβε τὴν ἀρχήν, πρῶτον μὲν ἐπολέμησε τοῖσ καλουμένοισ Ἀπιολανοῖσ πόλει τοῦ Λατίνων ἔθνουσ οὐκ ἀφανεῖ. οἱ γὰρ Ἀπιολανοὶ καὶ οἱ ἄλλοι σύμπαντεσ Λατῖνοι μετὰ τὸν Ἄγκου Μαρκίου θάνατον λελύσθαι τὰσ περὶ τῆσ εἰρήνησ ὁμολογίασ οἰόμενοι λῃστείαισ τε καὶ προνομαῖσ τὴν Ῥωμαίων γῆν ἐπόρθουν· ἀνθ’ ὧν τιμωρήσασθαι βουλόμενοσ αὐτοὺσ ὁ Ταρκύνιοσ ἐξεστράτευσε πολλῇ δυνάμει καὶ τῆσ γῆσ αὐτῶν τὴν κρατίστην ἐδῄωσεν·

ἀφικομένησ δ’ ἐκ τῶν πλησιοχώρων Λατίνων ἐπικουρίασ μεγάλησ τοῖσ Ἀπιολανοῖσ διττὰσ τίθεται πρὸσ αὐτοὺσ μάχασ, κρατήσασ δ’ ἐν ἀμφοτέραισ περὶ τὴν πολιορκίαν τῆσ πόλεωσ ἐγίνετο καὶ προσῆγε τοῖσ τείχεσι τὰσ δυνάμεισ ἐκ διαδοχῆσ·

οἱ δ’ ἐκ τῆσ πόλεωσ ὀλίγοι τε πρὸσ πολλοὺσ μαχόμενοι καὶ κατ’ οὐδένα καιρὸν ἀναπαύσεωσ τυγχάνοντεσ ἐξῃρέθησαν σὺν χρόνῳ. ἁλούσησ δὲ κατὰ κράτοσ τῆσ πόλεωσ οἱ μὲν πλείουσ τῶν Ἀπιολανῶν μαχόμενοι κατεσφάγησαν, ὀλίγοι δὲ τὰ ὅπλα παραδόντεσ ἅμα τοῖσ ἄλλοισ λαφύροισ ἐπράθησαν, παῖδέσ τε αὐτῶν καὶ γυναῖκεσ ἀνδραποδισθέντεσ ὑπὸ Ῥωμαίων ἀπήχθησαν, καὶ ἡ πόλισ διαρπασθεῖσα ἐνεπρήσθη. ταῦτα διαπραξάμενοσ ὁ βασιλεὺσ καὶ τὸ τεῖχοσ ἐκ θεμελίων κατασκάψασ ἀπῆγε τὴν δύναμιν ἐπ’ οἴκου καὶ μετὰ τοῦθ’ ἑτέραν στρατιὰν ἦγεν ἐπὶ τὴν Κρουστομερίνων πόλιν.

αὕτη δὲ ἀποικία μὲν ἦν Λατίνων, προσεχώρησε δὲ Ῥωμαίοισ ἐπὶ τῆσ Ῥωμύλου δυναστείασ· Ταρκυνίου δὲ τὴν ἀρχὴν παραλαβόντοσ τὰ Λατίνων αὖθισ ἤρξατο φρονεῖν. οὐ μὴν ἐδέησέ γε καὶ ταύτην πολιορκίᾳ τε παραστήσασθαι καὶ πόνῳ· μαθόντεσ γὰρ οἱ Κρουστομερῖνοι τό τε πλῆθοσ τῆσ ἡκούσησ ἐπ’ αὐτοὺσ δυνάμεωσ καὶ τὴν ἑαυτῶν ἀσθένειαν οὐδεμιᾶσ αὐτοῖσ ἐπικουρίασ παρὰ τῶν ἄλλων Λατίνων ἀφικομένησ ἀνέῳξαν τὰσ πύλασ καὶ προελθόντεσ οἱ πρεσβύτατοι τῶν πολιτῶν καὶ τιμιώτατοι παρέδοσαν αὐτῷ τὴν πόλιν ἀξιοῦντεσ ἐπιεικῶσ σφισι χρήσασθαι καὶ μετρίωσ.

τῷ δὲ κατ’ εὐχὴν τὸ πρᾶγμα ἐφάνη καὶ παρελθὼν εἰσ τὸ τεῖχοσ ἀπέκτεινε μὲν οὐδένα Κρουστομερίνων, ὀλίγουσ δὲ πάνυ τοὺσ αἰτίουσ τῆσ ἀποστάσεωσ φυγαῖσ ἀιδίοισ ἐζημίωσε, τοῖσ δ’ ἄλλοισ ἅπασι τὰ σφέτερα συνεχώρησεν ἔχειν καὶ τῆσ Ῥωμαίων πολιτείασ μετέχειν ὡσ πρότερον, τοῦ δὲ μηδὲν ἔτι παρακινῆσαι χάριν ἐποίκουσ αὐτοῖσ κατέλιπε Ῥωμαίουσ.

일치하는 문장이 없습니다.

SEARCH

MENU NAVIGATION